Stadnik İslamiadadakı daha bir görüşündə vaxtından əvvəl qələbə qazanıb

Azərbaycan qadın güləşçisi Mariya Stadnik Türkiyənin Konya şəhərində keçirilən V İslam Həmrəyliyi Oyunlarında 1/4 final görüşünü də vaxtından əvvəl qələbə qazanıb. 

"Report"un Konyaya ezam olunmuş əməkdaşı xəbər verir ki, titullu pəhləvan 1/4 finalda türkiyəli Əminə Çataloğlunu üstələyib. O, 1 dəqiqə 35 saniyəyə tam üstünlüklə qələbə qazanıb - 10:0.  

Qadın güləşi üzrə dördqat Olimpiya mükafatçısı, ikiqat dünya və səkkizqat Avropa çempionu, Avropa Oyunlarının ikiqat və IV İslam Həmrəylik Oyunlarının qalibi Mariya Stadnik Türkiyənin Konya şəhərində keçirilən İslamiadaya parlaq qələbə ilə başlayıb.

"Report"un Konyaya ezam olunmuş əməkdaşının xəbərinə görə, təxminən bir illik fasilədən sonra güləş döşəyinə qayıdan Stadnik A qrupunda Qazaxıstan təmsilçisi Svetlana Ankiçeva ilə qarşılaşıb.

O, 33 saniyəyə rəqibindən xallar alaraq görüşü erkən qələbə ilə başa vurub.

Azərbaycanın digər qadın güləşçisi, üçqat Avropa mükafatçısı, IV İslam Həmrəylik Oyunlarının gümüş, II Avropa Oyunlarının bürünc medalçısı Alyona Kolesnik (59 kq) də İslamiadaya qələbələrlə başlayıb. 59 kq çəkidə yer alan Kolesnik əvvəlcə qazaxıstanlı Dürdanə Bekeşi vaxtından əvvəl 12:0, daha sonra özbəkistanlı Dilfuzə Aymbetovanı 6:3 hesabı ilə üstələyib.