Yuxarı

Qalmaqala səbəb olan baş məşqçi Rusiya yığmasından kənarlaşdırılıb

Federasiyanın direktoru da vəzifəsindən azad edilib

Bakı. 9 sentyabr. REPORT.AZ/ Rusiyanın boks üzrə yığma komandasının baş məşqçisi Aleksandr Lebzyak postundan kənarlaşdırılıb. "Report"un məlumatına görə, bu barədə "TASS"a baş məşqçinin özü bildirib.

O, vəzifəsindən kənarlaşdırılmasını qeyri-qanuni adlandırıb: "Baş məşqçi postundan kənarlaşdırıldım. İnanıram ki, mənim vəzifədən uzaqlaşdırılmağım qeyri-qanunidir".

Baş məşqçinin yığmadan göndərilməsinə Rusiya Boks Federasiyasının İcraiyyə Komitəsi qərar verib. Üstəlik, qurumun direktoru Yevgeni Sudakovun da işinə son verilib. Lakin A.Lebzyak qərarla barışmadığını söyləyib: "Mən də İcraiyyə Komitəsinin üzvüyəm və hələ məzuniyyətdəyəm. Nə məni, nə də Sudakovu bu cür kənarlaşdıra bilməzlər. Üstəlik, iclasa dəvət edilməmişəm. Bu məsələni belə qoymayacağıq. Bizim məşqçilər şurası ilə bununla bağlı görüşümüz olacaq".

Artıq Lebzyakın yerinə təyinat da olub. Rusiya Boks Federasiyasının prezidenti Boris İvanyujenkov Oleq Menşikovun müvəqqəti olaraq baş məşqçi kimi fəaliyyət göstərəcəyini deyib.

Qeyd edək ki, Rusiyanın kişilərdən ibarət boks yığması 2016-cı il Yay Olimpiya Oyunlarında bir qızııl, bir gümüş və iki bürünc medal qazanıb. Bir bürünc medal isə qadın boksçunun aktivinə yazılıb. Yarışdan sonra baş məşqçi bir sıra yığma üzvlərini tənqid edib və onları "turist" adlandırıb. Lebzyakın bu hərəkəti isə qalmaqala skandala səbəb olub. Xüsusən, Çeçenistan prezidenti Ramzan Kadirov baş məşqçini həmin fikirlərə görə tənqid edib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi