İradə Aşumova: “Komanda Perudakı dünya çempionatında çox gözəl nəticə göstərdi”

"Komanda Peruda keçirilən dünya çempionatında çox gözəl nəticə göstərdi".

Bunu “Report”a açıqlamasında güllə atıcılığı üzrə Azərbaycan millisinin baş məşqçisi İradə Aşumova deyib.

Mütəxəssis komandanın Perunun paytaxtı Limada keçirilən dünya çempionatında 10 metr məsafəyə pnevmatik tapançadan atəş açmada ikinci yeri tutmasını dəyərləndirib:

“Dünya çempionatında yığmadan, əlbəttə, nəticə gözləyirdik. Çünki yanvardan başlayaraq onları bütün yarışlara - Dünya Kubokuna, Qran-pri turnirinə, Avropa çempionatına göndərmişdik. Atıcılıq Federasiyası həm yarışlarda iştirak etmək, həm də güllə, tapança, maaş məsələləri baxımından bütün şəraiti yaradıb. Həmçinin Gənclər və İdman Nazirliyi də təşkilatçılıq baxımından yaxından dəstək göstərib. Bu nəticəni gözləyirdik”.

O, birinci olan Hindistan yığmasından cəmi 1 xal geri qaldıqlarını vurğulayıb:

“Vladislav Kalmıkovdan 580 xallıq nəticəni çoxdan gözləyirdik. Çünki məşqlərdə bunu bacarırdı. Final mərhələsində də yaxşı işlədi, beşinci yeri tutdu. Dünya çempionatı üçün pis nəticə deyil. Zeynəb Sultanova idman ustası nəticəsini göstərdi. Zeynəbdə də psixoloji sədd var idi və inanırdıq ki, bunu keçəcək. Dünya çempionatında sanki qızılgül kimi açıldı. Çox gözəl və sevindirici nəticədir. Komanda birinci olan Hindistandan cəmi 1 xal geri qaldı. İkinci yer də uşaqlar üçün ruhlandırıcıdır, çünki artıq düşünürlər ki, onlar da kimlərisə məğlub edə bilərlər. Həmçinin məşqçi üçün də motivasiyadır. Uşaqlar çox sevinirlər və daha çox məşqlər etməyə çalışırlar. Hər kəsi təbrik edirəm”.

Qeyd edək ki, Azərbaycan millisi Perunun paytaxtı Limada keçirilən gənclər arasında dünya çempionatında 10 metr məsafəyə pnevmatik tapançadan atəş açmada gümüş medal qazanıb. Yarış oktyabrın 7-də başa çatacaq.