III Avropa Oyunları: Azərbaycan atletləri çıxışlarını başa vurublar

Azərbaycan atletləri Polşada keçirilən III Avropa Oyunlarında çıxışlarını başa vurublar.

“Report”un məlumatına görə, son gündə 6 idmançı fərdi çıxış edib.

Anna Yusupova 1500 metr məsafəni 4:38.00-a qaçaraq 6-cı yeri tutub. İsmayıl Əliyev nüvə itələmədə (15.84 m) ən yaxşı 7-ci, Fəxriyə Tağızadə isə uzunluğa tullanmada (5,14 m) 9-cu nəticəni göstərib.

İlahə Quliyeva qadınlarda, Aleksey Əliəkbərov kişilərdə 200 metr məsafəyə qaçışda qüvvəsini sınayıb. Hər iki idmançı müvafiq olaraq 25,33 və 22,25 saniyəlik nəticə ilə 10-cu olub.

Elman Abışov 5000 m məsafəni 16:26,70 dəqiqəyə qət edərək, 14 iştirakçı arasında cəmi iki nəfəri qabaqlaya bilib.

Cavid Məmmədov, Lamiyə Vəliyeva, Əli Abdıyev və İlahə Quliyevadan ibarət Azərbaycan yığması isə 4x400 metr məsafəyə qarışıq estafeti 3:31,55 dəqiqəyə tamamlayıb və 7-ci yerlə kifayətlənib.

Qeyd edək ki III Avropa Oyunları iyulun 2-də başa çatacaq.