​Azərbaycanın 3 kayakçı və kanoeçisi dünya çempionatında yarımfinala yüksəlib

Minsk. 30 iyul. REPORT.AZ/ Belarusun paytaxtı Minskdə yeniyetmələr və 23 yaşadək kayakçı və kanoeçilər arasında keçirilən dünya çempionatında Azərbaycan təmsilçiləri bu gün daha 3 yürüşə qatılıb.

"Report"un Minskə ezam olunmuş əməkdaşının verdiyi məlumata görə, əvvəlcə start xəttinə yeniyetmə kanoeçi Mixail Bıxkalo çıxıb.

O, 1 nəfərlik qayıqla (C-1) 200 metr məsafəyə seçmə yürüşdə 44,693 saniyə nəticə ilə 7-ci yeri tutub. Bıxkalo moldovalı Arkadi Qonçarov (45,928) və avstraliyalı Bencamin Menninqi (48,503) geridə qoyduğu halda, macar Konrad Nemedi (41,331), ukraynalı Sergey Naqornı (41,533), ispaniyalı Pablo Qranya (42,481), rumıniyalı Mariuş Milu (42,721), italiyalı Mattia Alfonsi (43,111) və meksikalı Gilyermo Quirino Medranodan (43,816) geri qalıb.

Bu nəticə ilə 17 yaşlı kanoeçi ən yaxşı 7-ci yer sahibi kimi yarımfinala yüksəlib. Bu gün Bakı vaxtı ilə saat 17:10-da başlanacaq növbəti mərhələ yürüşündə onun rəqibləri slovakiyalı Yakub Lutas, polşalı Yakub Brodka, çexiyalı Petr Fuksa, macar Konrad Nemedi, litvalı İlya Davidovski, alman Morits Adam, filippinli Ojay Fuentes və meksikalı Gilyerme Quirino Medrano olacaq. İlk 3 yerin sahibləri əsas finala, 4 - 6-cı yerləri tutanlar "B" finalına (10 - 18-ci yerlər) vəsiqə qazanacaqlar.

23 yaşadək kayakçıların mübarizəsində Tamerlan Mustafayev 1 nəfərlik qayıqla (K-1) 200 metr məsafəyə seçmə yürüşdə çıxış edib. O, finişə 37,699 saniyəyə 5-ci çataraq, alman Maks Lemke (35,238), belçikalı Conatan Delomberde (36,070), italiyalı Cakomo Çinti (36,608) və sloveniyalı Tilen Vidoviçdən (36,923) geri qalıb. 22 yaşlı idmançı yalnız makaulu Hyo Man Çonqu (43,655) üstələyib. Tunisli Yassin Mohamed ben Hacla əlcəzairli Ussama Cabali start xəttinə çıxmayıb. Mustafayev ilk "7-liy"ə düşdüyündən, adını yarımfinala yazdırıb.

Bu gün saat 17:30-da başlanacaq növbəti mərhələ yürüşündə təmsilçimiz tacik Abdusattor Qafurov, qırğız Kirill Bondar, belaruslu Dmitri Tretyakov, macar Balaj Birkaş, belçikalı Conatan Delomberde, portuqaliyalı Uqu Roxa, yeni zelandiyalı Karl Makmurtri və sinqapurlu Vey Çenq Brendon Uyla mübarizə aparacaq. İlk 2 yerin sahibi və 3-cü yeri tutanlar arasında ən yaxşı nəticə göstərən idmançı əsas finala, 3-4-cü yerlərin sahibləri və 5-ci yeri tutanlar arasında 2 ən yaxşı göstəriciyə malik olanı "B" finalına (10 - 18-ci yerlər), 5 - 6-cı yerlərdə qərarlaşanlar və 7-ci yeri tutanlar arasında 3 ən yaxşı nəticəyə imza atan şəxslər "C" finalına (19 - 27-ci yerlər) yüksələcəklər.

Nəhayət, Nikita Sablin 23 yaşadək kanoeçilər arasında 1 nəfərlik qayıqla (C-1) 200 metr məsafəyə seçmə yürüşdə finişə 42,209 saniyəyə 6-cı çatıb. Portuqaliyalı Tyaqo Tavares (40,249), belaruslu Qleb Saladuxa (40,466), fransalı Loik Leonar (40,511), ispan Fransisko Luenqo (40,574) və braziliyalı Mayko Ferreyra dos Santosdan (40,748) geri qalan 19 yaşlı idmançı ekvadorlu Visente Qonsaleslə (42,778) qırğız Tilek Satıbaldiyevi (44,599) üstələyib. İlk "6-lığ"a düşdüyündən, Sablin yarımfinala yüksəlib.

Bu gün saat 18:10-da startı veriləcək növbəti mərhələ yürüşündə onun rəqibləri latviyalı Boris Lonski, qazax Sergey Yemelyanov, alman Anton Reqorius, iranlı Adil Mojallalimoğadam, portuqaliyalı Tyaqu Tavareş, italiyalı Nikolae Krakyun, tailandlı Fanufonq Jiranaronqçay və filippinli Ermi Makaranas olacaq.

Qeyd edək ki, dünya çempionatına avqustun 31-də yekun vurulacaq. Azərbaycan təmsilçilərindən Aleksey Kupin 1 nəfərlik qayıqla (C-1), eləcə də Nikita Sablinlə birgə 2 nəfərlik qayıqla (C-2) 1000 metr məsafəyə yürüşdə yarımfinal səddini keçə bilməyərək, mübarizəni dayandırıb.