Azərbaycanın 12 pauerliftinqçisi dünya çempionu olub

Azərbaycan pauerliftinqçiləri Rusiyanın paytaxtı Moskvada keçirilmiş dünya çempionatında uğurla çıxış ediblər.

"Report"un məlumatına görə, yarışda Azərbaycan Pauerliftinq Federasiyasının baş katibi və idmançısı Hafiz Verdiyev (100 kq), həmçinin Namiq Mehdiyev (90 kq), Raif Süleymanov (90 kq, veteranlar) və Nicat Xosrovzadə (125 kq) deadlift növündə dünya çempionu olub. Roman Əhmədov (82,5 kq) ikinci, Aydın Hümbətov (125 kq) isə üçüncü yeri tutublar.

Pauerliftinq növündə isə tanınmış idmançılar - Ramil Əhmədov (100 kq) və Rövşən Xəlilov (75 kq) qızıl medal qazanıblar. Əhmədov dördüncü, Xəlilov isə beşinci dəfə fəxri kürsünün ən yüksək pilləsinə qalxıb. Xəlilov həm də peşəkar divizionda (ProDivision) çempion və dünya rekordunu qıran ilk azərbaycanlı idmançı olub.

Bu növdə həmçinin Hüseyn Hüseynov (52 kq), Ramin Süleymanzadə (60 kq), Fərdi Qurbanov (82,5 kq), Məhəmməd Hüseynov (90 kq), Elvin Müzəffərov (67,5 kq), Nihat Quliyev (100 kq) qızıl, Kamran Lazımov (82,5 kq) isə gümüş medala sahib çıxıblar.