Buxarest. 22 aprel. REPORT.AZ/ Beynəlxalq Şahmat Federasiyası (FİDE) Rumıniyanın İaşı şəhərində təşkil olunan məktəblilər arasında keçirilən şahmat üzrə dünya çempionatının bu gün keçiriləcək ilk turunu təxirə salıb.
“Report”un Şərqi Avropa bürosunun verdiyi məlumata görə, buna səbəb İaşi şəhərində son günlər hava şəraitinin kəskin dəyişməsi səbəb olub. Şəhərə yağan qar magistral yolların bağlanmasına, havaların dumanlı keçməsi isə bir sıra aviareyslərin təxirə düşməsinə səbəb olub. Nəticədə yarışda iştirak edəcək bəzi ölkələrin nümayəndə heyətləri İaşi şəhərinə nəzərdə tutulan vaxtda çata bilməyiblər.
Təşkilat Komitəsindən “Report”a verilən məlumata görə, açılış oyunları sabah, aprelin 24-də isə 2-ci və 3-cü turun oyunları keçiriləcək. 7 yaşından 17 yaşınadək kateqoriyada klassik şahmat üzrə yarışlarda Azərbaycanı 14 şahmatçı təmsil edir.
Oğlanlar:
7 yaş
Murad Mehtizadə (1124)
Ziya Məmmədov (1302),
9 yaş
Fərid Orucov (1496)
Əli Süleymanov (1357)
11 yaş
Süleyman Süleymanov (1726)
13 yaş
Altay Eynullayev (2229)
15 yaş
Murad İbrahimli (2306)
17 yaş
Xəzər Babazadə (2005)
Qızlar
7 yaş
Lalə Nəsirova
9 yaş
Leyla Budaqova Leyla (1237)
11 yaş
Səmra Qasımova (1565)
13 yaş
Səbinə Rzalı (1734)
15 yaş
Ləman Hacıyeva (1816)
17 yaş
Süsən Məmmədova (1902)
İaşi şəhər Mədəniyyət Sarayında keçiriləcək məktəblilər arasında dünya çempionatı aprelin 30-dək davam edəcək. Çempionata 46 ölkədən 500-dək şahmatçı qatılıb.