Azərbaycan millisinin iki cüdoçusu hərbi xidmətə çağırılıb

Azərbaycan milli komandasının cüdoçuları Kəramət Hüseynov (60 kq) və Murad Fətiyev (81 kq) hərbi xidmətə çağırılıb.

Bu barədə "Report"a yığmasının baş məşqçisi Mövlud Mirəliyev məlumat verib.

Mirəliyev hər iki idmançının bu səbəbdən Bakıdakı Böyük Dəbilqədə iştirak etməyəcəyini bildirib: "Kəramət əsgərlik səbəbindən məşqlərə çox qatıla bilmir. Ara-sıra hazırlıqlara gəlir. Hazırda bu məsələsi ilə məşğuldur. 1-2 günə xidmətə yollanacaq. Mərkəzi Ordu İdman Klubunda olacaq, daha sonra bizimlə məşqlərə qoşulaacaq".

Mütəxəssis Murad Fətiyevin də eyni səbəbdən yarışda iştirak etməyəcəyini söyləyib: "O, artıq əsgərlikdədir. Fövqəladə Hallar Nazirliyinin hərbi hissəsində xidmət edir. O da Hüseynov kimi sonradan məşqlərə qatılacaq".

Qeyd edək ki, Bakıdakı Böyük Dəbilqə 5 - 7 noyabrda keçiriləcək.