Avropa çempionatı: Rafael Ağayev və İrina Zaretska mübarizəyə başlayır

Azərbaycanın 7 karateçisi bu gün Türkiyənin Qaziantep şəhərində start götürəcək Avropa çempionatında mübarizəyə başlayacaq.

"Report"un məlumatına görə, Tokio-2020 Yay Olimpiya Oyunlarının gümüş mükafatçısı, 75 kq çəki dərəcəsində çıxış edən 5 qat dünya və 11 qat Avropa çempionu Rafael Ağayev 1/16 final mərhələsində kiprli Panayiotis Loizideslə üz-üzə gələcək.

84 kq-dakı Turqut Həsənov eyni raundda portuqaliyalı Tomas Silva, 84 kq-dan yuxarı çəki dərəcəsindəki Asiman Qurbanlı yunanıstanlı Georgios Tzanosla görüşəcək.

Qadınların yarışında 61 kq-dakı Alya Rzazadə 1/8 finalda Alessandra Mangiaçapra (İtaliya) - Aleksandra İlankoviç (Macarıstan) cütünün qalibi ilə, Tokio olimpiadasının digər gümüş mükafatçısı 68 kq-da mübarizə aparan İrina Zaretska eyni mərhələdə Alizi Agier (Fransa) - İvona Kavar (Bosniya və Herseqovina) duelinin güclüsü ilə döyüşəcək.

Nəhayət, 68 kq-dan yuxarı çəkidəki Fəridə Əliyeva 1/16 final mərhələsində serbiyalı İvana Peroviçlə qarşılaşacaq.

Bu gün həmçinin fərdi kata yarışlarında Roman Heydərov da çıxış edəcək.

Qeyd edək ki, Avropa çempionatı mayın 29-da başa çatacaq. Azərbaycan yarışda 17 karateçi və 5 para-karateçi ilə təmsil olunur.