Xankəndidə ilk mərhələdə 170 abonent “mavi yanacaq”la təmin edilib

Noyabrın 8-də saat 08:44-də Xankəndi şəhərində ilk mərhələdə 170 abonent “mavi yanacaq”la təmin edilib.

“Report” xəbər verir ki, bu barədə Azərbaycan Dövlət Neft Şirkətinin (SOCAR) "Azəriqaz" İstehsalat Birliyinin Qarabağ Regional qaz istismarı İdarəsinin rəisi Azay Muxtarov bildirib.

Onun sözlərinə görə, "Azəriqaz" tərəfindən işğaldan azad olunan bir çox ərazilərdə olduğu kimi Xankəndi şəhərində də qaz təchizatında infrastrukturun bərpası və yenidən qurulması istiqamətində sürətlə işlər davam etdirilir: “Ümumi uzunluğu 41 min metr yeraltı qaz xətti təsbit edilib, “mavi yanacaq” veriləcək binaların qaz kəmərlərində kipliyə sınaq işləri həyata keçirilib və bir çox binalarda bu işlər tamamlanıb”.

A.Muxtarov bildirib ki, Xankəndi şəhərində yeraltı qaz xətləri ilə yanaşı, 25 yaşayış binasının dik boruları və mənzildaxili qaz xətləri kipliyə sınaq olunub: "Sözügedən binalarda 470 ədəd smart-kart tipli sayğac quraşdırılıb ki, onlardan 170 abonent ilk mərhələdə təbii qazla təmin olunub".

Daha ətraflı video materialdan izləyə bilərsiniz:

https://youtu.be/iTYrG_DCP_Y?si=oFDpqeSoPfPXP82W