Yuxarı
    Bağlamaq

    ​"Transneft": Bakı-Novorossiysk kəməri ilə neftin nəqli dayandırılıb - YENİLƏNİB

    SOCAR: Nəqletmədə heç bir fasilə olmayıb, neftin kəmərlə nəqli qrafik üzrə davam etdirilir

    İlk xəbər saat 11:53-də verilib

    Bakı. 1 avqust. REPORT.AZ/ Rusiyanın "Transneft" şirkəti bəyan edib ki, Azərbaycanda baş verən zəlzələ səbəbindən Bakı-Novorossiysk boru kəməri ilə neftin nəqli dayandırılıb.

    "Report" TASS agentliyinə istindən xəbər verir ki, bu barədə şirkətin rəsmi nümayəndəsi İqor Dyomin jurnalistlərə bildirib.

    O,  həmçinin qeyd edib ki, bütün liman ərazisində işlər qaydasında davam etdirilir: "Yüklənmə qrafikə uyğun davam etdirilir".

    Qeyd edək ki, Bakı-Novorossiysk kəməri xam neftin şimal istiqamətində nəqli üçün inşa olunub. Bu kəmərlə xam neft Rusiya ərazisindən keçməklə Novorossiysk limanına nəql olunur. Bununla bağlı müvafiq müqavilə 1996-cı il fevralın 18-də Moskvada imzalanıb. İlk neft 1997-ci il oktyabrın 25-də dünya bazarına çıxarılıb.

    SOCAR martın 1-dən etibarən Novorossiysk istiqamətində neft nəqlini bərpa edib. Azərbaycan neftinin 2016-cı ildə Bakı-Novorossiysk kəməri ilə nəqli barədə saziş "Transneft" və SOCAR arasında bu ilin fevralın sonunda rəsmiləşdirilib.

    Bu gün Azərbaycanda zəlzələ olub. Azərbaycan Milli Elmlər Akademiyası nəzdində Respublika Seysmoloji Xidmət Mərkəzindən "Report"a verilən məlumata görə, yeraltı təkanlar yerli vaxtla saat 08:46-da İmişlidə qeydə alınıb. Zəlzələnin maqnitudası 5,6 bal, dərinliyi 19 km olub. Zəlzələ ətraf rayonlarda 4 bala qədər hiss olunub.

    ***

    Azərbaycan Dövlət Neft Şirkətindən (SOCAR) isə "Report"a bildirilib ki, Azərbaycan tərəfi bu boru kəməri ilə neftin nəqlini dayandırmayıb: "Nəqletmədə heç bir fasilə olmayıb, neftin kəmərlə nəqli qrafik üzrə davam etdirilir".

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi