“AzərEnerji” TEİAŞ ilə elektrik enerjisi infrastrukturunun qurulması məqsədilə Yol Xəritəsi imzalayıb

“Türkiye Elektrik İletim Anonim Şirketi” (TEİAŞ) və “AzərEnerji” ASC arasında elektrik enerjisinin idxal və ixrac infrastrukturunun qurulması məqsədilə Yol Xəritəsi imzalanıb.

“Report” xəbər verir ki, bunu Türkiyənin energetika və təbii sərvətlər naziri Alparslan Bayraktar “X” sosial hesabındakı hesabında yazıb.

“Azərbaycan-Türkiyə 3-cü Enerji Forumundan sonra həmkarım Pərviz Şahbazov ilə Forum protokolunu imzaladıq. Həmçinin əməkdaşlığımızı və dialoq imkanlarımızı gücləndirən səmərəli bir Forum keçirtdik

Bundan əlavə TEİAŞ və “AzərEnerji” ASC arasında qarşılıqlı əlaqə layihəsi çərçivəsində fəaliyyətləri ehtiva edən Yol Xəritəsi imzaladıq. İki ölkə arasında elektrik enerjisinin idxal və ixrac infrastrukturunun qurulması məqsədilə planlanan bu layihələrin uğurlu olmasını diləyirəm”, - nazir qeyd edib.

Bu gün “Türkiye Elektrik İletim Anonim Şirketi” (TEİAŞ) və “AzərEnerji” ASC arasında qarşılıqlı əlaqə layihəsi çərçivəsində fəaliyyətləri ehtiva edən Yol Xəritəsinin imzalanması ilə elektrik enerjisi sahəsində texniki əməkdaşlığa dair daha bir mühüm addım atılacaq.

“Report”un Naxçıvana ezam olunmuş müxbiri xəbər verir ki, bunu Türkiyənin energetika və təbii sərvətlər naziri Alparslan Bayraktar bu gün Naxçıvanda keçirilən Azərbaycan-Türkiyə 3-cü Enerji Forumu və ilk dəfə baş tutan "Naxçıvan - Yaşıl Enerji Zonası" Beynəlxalq Konfransında çıxışı zamanı bildirib.

“Həyata keçirəcəyimiz layihələrlə, ölkələrimiz arasındakı dostluğu bir daha təsdiqləyəcək, Naxçıvan ilə olan əlaqələrimizi qüvvətləndirmiş olacağıq”, - deyə türkiyəli nazir qeyd edib.