Yuxarı

​SOCAR yeraltı qaz anbarlarını genişləndirir

Qalmaz sahəsində qazpaylama məntəqəsinin genişləndirilməsi başlanılıb

Bakı. 5 oktyabr. REPORT.AZ/ Azərbaycan Prezidenti İlham Əliyevin ölkənin təbii qaza olan tələbatının davamlı təminatı və ixrac imkanlarının genişləndirilməsi məqsədi ilə Azərbaycan Dövlət Neft Şirkəti (SOCAR) qarşısında yeraltı qaz anbarlarının aktiv tutumunun artırılmasına dair qoyduğu vəzifə çərçivəsində “Azneft” İstehsalat Birliyinin Qaz Anbarlarının İstismarı İdarəsində bir sıra tədbirlər həyata keçirilib.

"Report" SOCAR-a istinadən xəbər verir ki, Qaradağ qazsaxlama sahəsinin qazpaylama məntəqəsində əlavə 5 quyuluq manifold sisteminin tikintisi sona çatdırılıb. Burada 5 quyuluq manifold qovşağı tikilib, quyulara şleyf xətləri çəkilib, yeni şam xətti və şam separatoru, 1 ədəd tədqiqat separatoru, eləcə də mövcud separatorlara qoruyucu klapanlar quraşdırılaraq sistemlə əlaqələndirilib.

Operator binası, emalatxana və anbar tikilib. Sahədəki qazpaylama məntəqəsinin genişləndirilməsinə başlanılıb. Burada 12 quyuluq yeni qazpaylama məntəqəsi tikilib, quyulara şleyf xətləri çəkilib, 2 ədəd məhsuldarlığı sutkalıq 7 milyon kubmetr, 2 ədəd məhsuldarlığı sutkalıq 10 milyon kubmetr olan nəql separatorları, 2 ədəd tədqiqat separatoru quraşdırılıb, əlaqələndirici xətlər çəkilərək mövcud sistemlə əlaqələndirilib. Manifold xətlərində donmaların qarşısını almaq üçün 44 ədəd dozator nasosu quraşdırılıb, nasosxana inşa olunub. Qış mövsümündə texnoloji avadanlıqların və inzibati otaqların qızdırılması üçün qazanxana tikilib. Qazpaylama məntəqəsinin yanğınsöndürmə sistemi tələblərə uyğun yenidən çəkilib.


Qalmaz qazsaxlama sahəsində isə qazmadan alınmış və eyni xəttə işləyən quyuların qoşulması üçün qazpaylama məntəqəsinin genişləndirilməsi işlərinə başlanılıb. Sahədə əlavə 5 quyuluq manifold qovşağının tikintisinə start verilib, Qalmaz Qaz Kompressor Sahəsində məhsuldarlığı sutkalıq 10 milyon kubmetr olan 2 ədəd toztutucu quraşdırılaraq istismara verilib.


"SOCAR-ın yeraltı qaz anbarları payız-qış mövsümünə tam hazır vəziyyətə gətirilib"-,məlumatda qeyd olunub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi