Yuxarı

"Report": Neft 42-45 dollar/barelə qədər bahalaşa bilər

Daha sonra isə qiymətlər yenidən azalmağa başlayacaq

Bakı. 7 mart. REPORT.AZ/ Dünya bazarında neftin qiyməti ABŞ-da aktiv neft quyularının sayının azalması ilə yüksəlişə keçib. "Report" xəbər verir ki, ABŞ-ın "Baker Hughes" şirkətinin hər həftənin cümə günü ənənəvi olaraq açıqladığı aktiv neft-qaz quyuları hesabatına görə, neft quyularının sayı 8 ədəd və ya 2% daha enərək 392 təşkil edib. İl ərzində isə ABŞ-da aktiv buruqların sayı 1 194 ədəd və ya 71% azalaraq 489 ədədə enib. Qeyd edək ki, ABŞ-da aktiv neft-qaz quyularının sayı 2010-cu ildən ən minimal həddə çatıb və 2009-cu ilin dekabr ayı səviyyəsinə qədər azalıb.

Hesabatın açıqlanması investorlarda ABŞ-da neft təklifinin getdikcə azalacağı gözləntisi yaradıb və nəticədə, "Brent" markalı neftin qiyməti cümə günü 3,6% artaraq 38,72 dollar/barel təşkil edib. ABŞ Xammal Derivativ Əməliyyatlar Komissiyasının (CFTC) hesabatına görə, hedc fondları neft qiymətlərinin 20 dollar/barelə azalmayacağını görüncə, öz qısa mövqelərini sürətlə bağlamağa başlayıb.

Lakin hesabatların neft bazarına müsbət təsirlərinə baxmayaraq, ABŞ-da artan neft ehtiyatları son 80 ilin maksimal həddinə çatıb. İnvestorlar isə daha öncə Rusiyada martın 20-nə planlaşdırılan OPEC və təşkilata üzv olmayan ölkələrinin sammitinin nəticələrini maraqla gözləyirlər. Qeyd edək ki, son məlumatlara əsasən, görüşün yeri Qətər və ya Avstriyaya dəyişdirilə bilər. Görüşün 20 mart-1 aprel tarixləri arasında olması gözlənilir.

Avstraliyanın "CMC Markets" şirkətinin baş iqtisadçısı Rik Spunerə (Ric Spooner) görə, ABŞ-da hasilatın azalması davam edərsə qiymət artımı kəskin xarakter ala bilər.

CFTC-nin məlumatına görə, 23 fevral - 1 mart tarixləri arasında WTI markalı neftdə spekulyatorlar qısa mövqelərini 25 639 ədəd və ya 15% azaldaraq 150 718-ə endirib. Qısa mövqelərin enməsi uzun mövqelərin 24 886 ədəd artmasına gətirib çıxarıb.

"Report"un analitik qrupu hesab edir ki, son 18 ayda baş verən 90 dollar/barellik sərt azalmanın ardından neft qiymətləri texniki düzəliş edir və 42-45 dollar/barelə qədər bahalaşması mümkündür: "Daha sonra isə qiymətlər yenidən azalmağa başlayacaq. Neft qiymətləri yaxın 3 ildə 20-50 dollar/barel aralığında dalğalanacaq. Qyimətlərin kəskin artması və uzun müddət yüksək səviyyədə qalması ABŞ şist neft hasilatçılarını yenidən aktivləşdirə bildiyindən, hazırda imkansız görünür".

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi