Pərviz Şahbazov: “Azərbaycan qazının Avropaya ixracını artırmaq üçün tərəfdaşlarla işlərə başlanılıb”

Azərbaycan təbii qazının Avropaya ixracını artırılması üçün bu ilin yanvar ayından tərəfdaşlarla işlərə başlanılıb.

“Report”un xəbərinə görə, bunu Azərbaycanın energetika naziri Pərviz Şahbazov X Qlobal Bakı Forumu çərçivəsində “Avrasiya zonasında yeni enerji və nəqliyyat dəhlizlərinin rolu” mövzusunda keçirilən növbəti panel iclasda çıxışı zamanı deyib.

Nazırın sözlərinə görə, bu, sadə məsələ deyil: "Azərbaycan 2027-ci ildən Avropaya qaz ixracını iki dəfə artırmağı planlaşdırır"

P.Şahbazov Avropaya enerji ixracı məsələsinə toxunaraq qeyd edib ki, Zəngəzur dəhlizi həm nəqliyyat, həm də enerji dəhlizi olacaq: “Enerjinin bu dəhliz vasitəsi ilə Naxçıvana, Naxçıvandan Türkiyəyə və Avropaya nəqlini planlaşdırırıq”.

Qeyd edək ki, Azərbaycan təbii qazını Avropaya nəql edən Trans-Adriatik Qaz Boru Kəməri (TAP) ilə artıq təxminən 21,5 milyard kubmetr qaz ixrac edilib.

Trans-Adriatik Boru Kəmərinin tikintisi 2020-ci ilin oktyabrında başa çatıb. TAP-ın ümumi uzunluğu 878 km-dir ki, bunun da 550 km-i Yunanıstanın şimal hissəsindən, 215 km-i Albaniya ərazisindən, 105 km-i Adriatik dənizinin dibi ilə, 8 km-i isə İtaliya ərazisindən keçir. Azərbaycan qazının TAP vasitəsilə İtaliya, Yunanıstan və Bolqarıstandakı istehlakçılara tədarükünə 2020-ci il dekabrın 31-dən başlanılıb.