Ötən il SOCAR metanol istehsalını 24 %-dən çox artırıb

Azərbaycan Dövlət Neft Şirkətinin (SOCAR) Metanol zavodunda 2020-ci il ərzində 476 min ton metanol məhsulu istehsal edilib.

“Report” xəbər verir ki, bu barədə SOCAR-ın saytında dərc olunan şirkətin 2020-ci il üzrə illik hesabatında deyilir.

Hesabata əsasən, bu, 2019-cu ilin göstəriciləri ilə müqayisədə 24,3 % çoxdur.

2020-ci ildə Metanol zavodu məhsul istehsalı ilə bağlı proqnoz tapşırığını 99 % yerinə yetirib.

Hesabat dövründə 478,9 min ton metanol məhsulu satılıb ki, bu da daha əvvəlki illə müqayisədə 19,7 % çoxdur.

Bunun 469 min tonu ixracın, 9,9 min tonu isə daxili bazarın payına düşüb. Daha əvvəlki ilin göstəriciləri ilə müqayisədə bu müfaviq olaraq 3,7 % və 20,1 % çoxdur.

Əsas ixrac istiqamətləri Türkiyə, İtaliya, Rumıniya, İsrail və İspaniya ölkələri olub.