OPEC iyulda Azərbaycanda gündəlik neft hasilatının həcmini hesablayıb

İyulda Azərbaycanda gündəlik neft hasilatı orta hesabla 485 min barel təşkil edib.

"Report" bu barədə OPEC-in aylıq hesabatına istinadən xəbər verir.

Məlumata görə, iyulda Azərbaycanda gündəlik neft hasilatı iyun ayı ilə müqayisədə 4 min barel və ya 0,8 % artıb.

Hesabata əsasən, OPEC+ razılaşması çərçivəsində Azərbaycanın bu il üçün gündəlik neft hasilatı kvotası 551 min barel olduğu halda, iyul ayında faktiki hasilat 66 min barel geriləyib.

OPEC-in məlumatına görə, bu ilin birinci rübündə Azərbaycanda gündəlik orta hesabla 477 min barel, ikinci rübdə isə 474 min barel neft hasil edilib.

2023-cü ildə ölkədə gündəlik neft hasilatı orta hesabla 503 min barel olub.