Yuxarı

OPEC hasilatın azaldılması öhdəliyinin icrasında Azərbaycanın aparıcı rol oynadığını bəyan edib

OPEC hasilatın azaldılması öhdəliyinin icrasında Azərbaycanın aparıcı rol oynadığını bəyan edib
Ötən il noyabrın 30-da OPEC üzrə gündəlik neft hasilatının 32,5 mln. barelə endirilməsi barədə razılıq əldə olunub

Bakı. 6 mart. REPORT.AZ/ Neft İxrac edən Ölkələr Təşkilatına (OPEC) üzv olan və kartelə daxil olmayan ölkələrin 10 dekabr 2016-cı il tarixində Vyanada neft hasilatının azaldılması ilə bağlı əldə etdiyi razılaşmaya uyğun olaraq, Azərbaycan 2017-ci ilin fevral ayı ərzində gündəlik neft hasilatı ilə bağlı məlumatları Birgə Monitorinq Komitəsinin Birgə Texniki Komissiyasına təqdim edib.

Bu barədə “Report”a Azərbaycan Energetika Nazirliyinin mətbuat xidmətindən məlumat verilib.

Həmin məlumatlara əsasən, bu ilin fevral ayı ərzində ölkə üzrə gündəlik neft hasilatı 776,4 min barel olub. Bunun 726,4 min barelini xam neft, 50,0 min barelini isə kondensat təşkil edib. Gündəlik 604,1 min barel xam neft, 50,0 min barel kondensat, 26,8 min barel isə neft məhsulları ixrac edilib. Beləliklə, 11 ölkənin 2017-ci il yanvarın 1-dən gündəlik neft hasilatını 558 min barel azaltmaları barədə əldə olunmuş razılaşma çərçivəsində Azərbaycan hasilatı sutkada 35 min barrel azaltmaqla bağlı götürdüyü öhdəliyi tam yerinə yetirib. Qeyd edək ki, yanvar ayı ərzində ölkə üzrə gündəlik neft hasilatı 793,9 min barel olub.

OPEC və qeyri-OPEC ölkələrinin nazirlərindən ibarət Birgə Monitorinq Komitəsindən Energetika Nazirliyinə daxil olmuş məktubda Azərbaycanın anlaşmaya 214% əməl etməsi qeyd olunaraq, Azərbaycanın mövqeyi təqdir edilib. Bildirilir ki, Azərbaycan bu prosesdə aparıcı rol oynayan ölkələrdən biridir və belə ölkələrin töhfələri olmadan OPEC və kartelə üzv olmayan ölkələr yanvar ayında hasilatın azaldılması ilə bağlı öhdəliyi 86% -dən az yerinə yetirəcəkdi.

Xatırladaq ki, ötən il noyabrın 30-da OPEC üzrə gündəlik neft hasilatının 1,2 mln. barel azaldılaraq hasilatın 32,5 mln. barelə endirilməsi barədə razılıq əldə olunub. Dekabrın 10-da isə Vyanada OPEC üzvləri ilə təşkilata daxil olmayan 11 ölkə, o cümlədən Azərbaycan ümumi hasilatın sutkada 558 min barel azaldılması barədə sazişə imza atıb. Saziş bu ilin ilk yarısı üçün bağlanıb və onun müddətinin uzadılması mümkündür.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Tərəfdaşların xəbərləri


Xəbər lenti

Son xəbərlər



Orphus sistemi