Neft hasil edən ölkələr Vyana sazişinin uzadılmasını müzakirə edəcəklər

Bakı. 25 may. REPORT.AZ/ OPEC-ə daxil olan və olmayan neft ölkələrinin nümayəndələri cümə axşamı Vyanada neft hasilatının azaldılmasına dair sazişin fəaliyyət müddətinin daha 9 ay – 1 aprel 2018-ci il tarixinə qədər uzadılması barədə tövsiyəni müzakirə edəcəklər.

"Report" xəbər verir ki, bununla belə, neft hasilatının azaldılması həcminin olduğu kimi saxlanılması nəzərdə tutulur.

Müvafiq tövsiyəni mayın 24-də Sazişin İcrasının Monitorinqi üzrə Nazirlər Komitəsi qəbul edib. Bu komitə, həmçinin hasilatın azaldılması üzrə öhdəliklərin icra dərəcəsini də qiymətləndirib. Belə ki, OPEC-ə üzv olan və olmayan neft ölkələri tərəfindən hasilatın azaldılmasına dair sazişin yerinə yetirilməsi səviyyəsi aprel ayında 102 faiz təşkil edib.