Yuxarı
    Bağlamaq

    Natiq Əliyev: "Rəsmi Vaşinqtonun Cənub Qaz Dəhlizi layihəsi ilə bağlı mövqeyinə sadiqliyi bizim üçün vacibdir"

    ABŞ rəsmisi perspektivdə Türkmənistanın da Cənub Qaz Dəhlizinə qoşulma imkanları ilə maraqlanıb

    Bakı. 31 may. REPORT.AZ/ Energetika naziri Natiq Əliyev XXIV Beynəlxalq “Xəzər Neft və Qaz-2017” sərgi-konfransı çərçivəsində Bakıda səfərdə olan ABŞ dövlət katibinin köməkçisinin enerji diplomatiyası üzrə müavini xanım Robin Danniqanı qəbul edib.

    Nazirlikdən “Report”a verilən məlumata görə, N.Əliyev tədbirdə iştirakına və ABŞ Prezidenti Donald Trampın Azərbaycana dəstəyini ifadə edən məktubuna görə xanım R.Danniqana təşəkkürünü bildirib. O, ABŞ prezidentinin iki ölkə arasında tərəfdaşlıq münasibətlərini, Azərbaycanın enerji təhlükəsizliyinin təminatı istiqamətində səylərini yüksək qiymətləndirməsinin və Cənub Qaz Dəhlizi layihəsinə dəstəyini əks etdirən fikirlərinin Azərbaycana hörmətin göstəricisi kimi qəbul edildiyini vurğulayıb: “ABŞ regionda bütün enerji layihələrinə həmişə güclü dəstəyini nümayiş etdirib və Amerika hökumətinin bu mövqeyi heç vaxt dəyişməyib. Rəsmi Vaşinqtonun Cənub Qaz Dəhlizi layihəsi ilə bağlı mövqeyinə sadiqliyi bizim üçün vacibdir,” - deyə N.Əliyev qeyd edib. Nazir layihənin gedişatı və gələcək inkişaf istiqamətləri barədə fikirlərini qonaqla bölüşüb.

    Xanım R.Danniqan isə XXIV Beynəlxalq “Xəzər Neft və Qaz-2017” sərgisinin yüksək səviyyədə təşkili ilə əlaqədar təbrikini çatdıraraq, belə tədbirlərin müasir texnologiyaların və təcrübələrin mübadiləsi üçün əlverişli platforma olduğunu deyib. O, Cənub Qaz Dəhlizi Məşvərət Şurası çərçivəsində nazirlərin III görüşündə və bu sərgidə iştirakını Azərbaycanın enerji təhlükəsizliyinə töhfə verən siyasətinə ABŞ-ın münasibətinin göstəricisi olduğunu söyləyib. Ölkəsinin əsas prioritetlərindən biri kimi Cənub Qaz Dəhlizini diqqət mərkəzində saxladığını deyərək, perspektivdə Türkmənistanın layihəyə qoşulma imkanları ilə maraqlanıb.

    Bundan başqa, görüşdə Azərbaycanda Neft-Qaz Emalı və Neft-Kimya Kompleksi və Heydər Əliyev adına NEZ-in yenidən qurulması layihələrində ABŞ şirkətlərinin iştirakının vacibliyi müzakirə edilib. ABŞ dövlət katibinin köməkçisinin enerji diplomatiyası üzrə müavini həmçinin Neft İxrac edən Ölkələr Təşkilatına (OPEC) üzv və qeyri-üzv dövlətlərin Vyana görüşü və neft bazarının inkişaf tendensiyaları ilə maraqlanıb.

    Toplantıda Azərbaycan-ABŞ enerji əməkdaşlığının digər istiqamətləri üzrə də müzakirələr aparılıb.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi