IEA: ABŞ artıq bu il neft hasilatı üzrə dünya lideri olacaq

Bakı. 13 fevral. REPORT.AZ/ ABŞ-da neft hasilatı şist neft hasilatında artım hesabına yaxın rəqibləri olan Səudiyyə Ərəbistanı və Rusiyanı ötərək 2018-ci ilin sonuna qədər onun lider ölkəyə çevrilməsinə səbəb olacaq.

"Report" TASS agentliyinə istinadən xəbər verir ki, bu proqnozu Beynəlxalq Energetika Agentliyi (IEA) fevral hesabatında yayıb.

Hesabatda OPEC+ anlaşmasının qlobal neft ehtiyatlarında azalmaya yol açdığı qeyd olunur. OECD ölkələrinin izafi neft ehtiyatları 5 dəfə azalaraq 264 mln. bareldən 52 mln. barelə düşüb. 

"Sanki anlaşma müsbət effekt verib. Amma bu, belə deyil. Noyabr-yanvar ayları ərzində ABŞ-da neft hasilatı 846 min barel/gün artım göstərib və Səudiyyə Ərəbistanını ötüb. İlin sonuna qədər isə ABŞ Rusiyanı da ötərək neft hasilatında lider ölkəyə çevrilə bilər", - hesabatda qeyd olunub.

Agentlik 2018-ci il üçün neft tələbi ilə bağlı proqnozunu 100 min barel/gün artıraraq 99,2 mln. barel/günə çatdırıb. Proqnozlara görə, 2017-ci illə müqayisədə isə tələbatın 1,4 mln. barel/gün artım göstərəcəyi gözlənilir. Lakin OPEC istisna olmaqla, neft hasilatının isə 1,8 mln. barel/gün artaraq və 59,9 mln. barel/günə çatacağı proqnozlaşdırılır.