Yuxarı
    Bağlamaq

    İranın dünyanın ən böyük qaz ehtiyatlarına sahib olduğu açıqlanıb

    ABŞ qaz hasilatına görə 2016-cı ildə dünya lideri olub

    Bakı. 26 iyun. REPORT.AZ/ Dünyanın təsdiq olunmuş ən böyük təbii qaz ehtiyatına sahib olan ölkənin 33,5 trln. kub metrlə İran olduğu açıqlanıb. "Report", "Bloomberg" agentliyinə istinadən xəbər verir ki, bu barədə Britaniyanın nüfuzlu "BP" şirkətinin "BP 2017-ci il dünya enerji statistikası icmalı" adlı hesabatında bildirilib.

    Hesabatda qeyd olunub ki, dünyada hazırda təqdiq olunmuş 186,6 trln. kub metr təbii qaz ehtiyatı var ki, bu da 50 ildən çox müddətə dünyanı təmin etməyə kifayət edər. Ən çox təbii qaz ehtiyatı 79,4 trln. kub metr və ya məcmu ehtiyatların 42,5%-i ilə Orta Şərqdə yerləşib. Ən az təbii qaz ehtiyatı isə Cənub və Orta Amerikadadır.

    Dünya təbii qaz ehtiyatlarına görə ikinci sırada yer alan ölkə isə Rusiyadır. Onun təsdiq olunmuş 32,3 trln. kub metr qaz ehtiyatı var. Üçüncü sırada yer alan ölkə 24,3 trln. kub metrlə Qətərdir. Bu üçlüyü 17,5 trln. kub metrlə Türkmənistan, 8,7 trln. kub metrlə ABŞ izləyir. S.Ərəbistanının 8,4 trln., Birləşmiş Ərəb Əmirliklərinin 6,1 trln., Venesuelanın 5,7 trln., Çinin 5,4 trln., İraqın isə 3,7 trln. kub metr təbii qaz ehtiyatı var.

    Ötən ilin yekunlarına görə, ən çox təbii qaz istehsal edən ölkə isə ildə 749,2 mlrd. kub metrlə ABŞ olub. Beləliklə 2016-cı ildə istehsal olunan qazın 21%-i ABŞ-da hasil olunub. ABŞ-ı 579,4 mlrd. kub metrlə Rusiya izləyib. İran isə ən böyük ehtiyatlara sahib olmasına baxmayaraq üçüncü sırada yer alıb. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi