Yuxarı
    Bağlamaq

    “Günəşli” yatağındakı 10 saylı özül qəzadan sonra bərpa edilir

    “Azneft”in baş direktoru Daşqın İskəndərovun rəhbərlik etdiyi işçi heyət özülə baxış keçirib

    Bakı. 24 iyun. REPORT.AZ/ SOCAR-ın “Neftqaztikinti” Tresti “Azneft” İstehsalat Birliyinin sifarişi ilə 28 May adına NQÇİ-nin istismar etdiyi “Günəşli” yatağında 10 saylı dərin dəniz özülünün qəzadan sonra yenidən qurulması layihəsi üzrə aparılan tikinti-quraşdırma işlərini uğurla davam etdirir.

    SOCAR-dan “Report”a verilən məlumata görə, qəzanın aradan qaldırılması istiqamətində aparılan işlərlə tanış olmaq məqsədi ilə “Azneft” İstehsalat Birliyinin baş direktoru Daşqın İskəndərovun rəhbərlik etdiyi işçi heyət özülə baxış keçirib. Bildirilib ki, həyata keçirilən təmir-bərpa işləri çərçivəsində indiyədək dik və çəp dirəklər, alt rabitələr, döşəmələr, modullararası arakəsmə, konsol quraşdırılıb, heyətsiz sualtı aparatlar vasitəsilə xətlərin mövcud vəziyyəti yoxlanılıb, vertolyot meydançasının tavan hissəsi və yaşayış bloku təmizlənərək rənglənib. Elektrik xətlərinin çəkilişi və işıqlandırma işləri davam etdirilir, iki əsaslı təmir qülləsi quraşdırılır. Quyu manifoldların quraşdırılması qısa zamanda həyata keçiriləcək. İşçi heyət quyuətrafı zonanın bərpadan sonrakı texniki vəziyyəti ilə tanış olub. Bildirilib ki, quyuətrafı zonada yanğından mühafizə sistemi quraşdırıldıqdan sonra 43 və 340 nömrəli quyularda əsaslı təmirə başlanılacaq. Hər bir quyuya nəzarət sistemi ən müasir standartlara cavab verən avadanlıqlarla təchiz olunacaq. Baş direktor özüldə həyata keçiriləcək təmir-bərpa işlərinin vaxtında və yüksək keyfiyyətlə başa çatdırılmasının vacibliyini vurğulayıb, quyuların təkrar istismara qaytarılması üçün lazımi avadanlıqlarla təmin olunması üçün müvafiq göstəriş verib.

    Daşqın İskəndərov görülən təmir-bərpa işləri ilə bağlı təhlükəsizlik qaydalarına əməl olunmasının, ekoloji məsələlərə diqqət yetirilməsinin, təmir-bərpa işlərinin yüksək keyfiyyətlə aparılmasının və quraşdırılacaq avadanlıqların etibarlılığının mühüm əhəmiyyət daşıdığını söyləyərək qeyd edib ki, 10 saylı dərin dəniz özülü ən yüksək səviyyədə bərpa olunacaq və yeni özüldən seçilməyəcək.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi