Dünya Bankı 2021-2022-ci illər üçün neftin qiymətinə dair proqnoz göstəricilərini yaxşılaşdırıb

Dünya Bankı (DB) 2021-2022-ci illər üçün orta neft qiymətləri üzrə proqnoz göstəricilərini əhəmiyyətli dərəcədə yaxşılaşdırıb.

“Report” DB-nin Rusiya iqtisadiyyatı ilə bağlı hesabatına istinadən xəbər verir ki, 2021 və 2022-ci illərdə qiymətlərin müvafiq olaraq bir barel üçün 56 və 60 dollar təşkil edəcəyi proqnozlaşdırılır ki, bu da 2016-2019-cu illər üçün orta qiymətə yaxındır.

Dünya Bankının əvvəlki proqnozunda neftin qiyməti 2021-ci il üçün 44 dollar, 2022-ci il üçün isə 50 dollar səviyyəsində təyin olunmuşdu.

DB iqtisadçıları hesab edirlər ki, vaksinasiya miqyasının genişlənməsi neftə tələbatın tədricən artmasına kömək edəcək. Bu tələbi OPEC+ sazişi çərçivəsində hasilatın artması qarşılayacaq.

Lakin bankın analitikləri xəbərdarlıq edirlər ki, alyansın istifadə olunmayan böyük istehsal gücləri qiymət artımını məhdudlaşdıracaq.

Bundan əlavə, qiymətlərin kəskin artması ABŞ-da şist neft istehsalında artıma səbəb ola bilər.