Ceyhan terminalında daha bir kəmərlə nəql edilən neft üzrə əməliyyatlar bərpa edilib

Türkiyənin borularla nəqletmə operatoru olan BOTAŞ şirkəti Ceyhan terminalından Batman Dörtyol Neft Boru Kəmərindən xam neftin yüklənməsi və boşaldılması əməliyyatlarını bərpa edib.

“Report” xəbər verir ki, bu barədə BOTAŞ-ın sosial media hesabında palyaşım edilib.

“Bu çərçivədə zəlzələdən sonra 3-cü tankerin yüklənməsi əməliyyatı problemsiz davam edir”, - şirkət bildirib.

Məlumata görə, fevral ayının 6-da Kahramanmaraşda baş verən iki böyük zəlzələdən sonra ehtiyat tədbiri olaraq neft axınının dayandırıldığı bildirilib.

Xatırladaq ki, Batman Dörtyol Neft Boru Kəmərində də xam neftin yükləmə-boşaltma əməliyyatları da dayandırılmışdı. Batman Dörtyol Neft Boru Kəmərinin sistemi zəlzələdən 39 saat sonra istifadəyə veriib.

Fevralın 6-da ocağı Türkiyənin Kahramanmaraş şəhərinin Pazarcık rayonu olan 7,7 maqnitudalı və 9 saat sonra episentri eyni şəhərin Elbistan rayonu olan 7,6 maqnitudalı iki zəlzələ olub. Son məlumata görə, Türkiyədə dağıdıcı zəlzələ nəticəsində ölənlərin sayı 18 342 nəfərə çatıb. Təbii fəlakət nəticəsində 74 242 nəfər yaralanıb. Zəlzələdən sonra bölgədə 1 509 afterşok qeydə alınıb.

Türkiyə Prezidenti Rəcəb Tayyib Ərdoğan ölənlərin xatirəsini anmaq üçün ölkədə 7 günlük matəm elan edib. Bundan başqa, ölkənin zəlzələ baş verən 10 şəhərində 3 aylıq fövqəladə vəziyyət elan olunub.

Bu hadisə Türkiyədə 1939-cu ildən bəri qeydə alınan ən güclü zəlzələ kimi tarixə düşüb.

Təbii fəlakət həmçinin Suriyada böyük dağıntı və minlərlə itkilərə səbəb olub, eyni zamanda Livan, Kipr, İraq, İsrail, İordaniya, İran və Misirdə də hiss edilib.