Bu il Azərbaycanda elektrik enerjisinin istehsalı artıb

Bu ilin yanvar-oktyabr aylarında respublikada elektrik enerjisinin istehsalı ötən ilin müvafiq dövrü ilə müqayisədə 1 milyard 554,4 milyon kVt/saat artaraq 22 milyard 855,8 milyon kVt/saat olub.

“Report” xəbər verir ki, bu barədə Energetika Nazirliyinin 2021-ci ilin yanvar-oktyabr ayları üzrə elektrik enerjisinə dair operativ məlumatlarında deyilir.

Məlumata görə, hesabat dövründə ötən ilin 10 ayına nisbətən elektrik enerjisinin istehsalı İstilik Elektrik Stansiyalarında (İES) 1 milyard 394,8 milyon kVt/saat artaraq 21 milyard 458,6 milyon kVt/saat, Su Elektrik Stansiyalarında (SES) 162,5 milyon kVt/saat artaraq 11 milyard 08,9 milyon kVt/saat, digər mənbələr (KES, GES və BMTYZ) üzrə isə 2,9 milyon kVt/saat azalaraq 288,3 milyon kVt/saat olub.

Külək elektrik stansiyalarında 77 milyon kVt/saat, günəş elektrik stansiyalarında 48,5 milyon kVt/saat, Bərk Məişət Tullantılarının Yandırılması Zavodunda (BMTYZ) isə 162,8 milyon kVt/saat elektrik enerjisi istehsal edilib.

Yanvar-oktyabr aylarında elektrik enerjisinin istehsalı “Azərenerji” ASC üzrə 20 milyard 504,3 milyon kVt/saat (İES-lərdə 19 milyard 525,3 milyon kVt/saat, SES-lərdə 979 milyon kVt/saat), Naxçıvan MR Dövlət Energetika Xidməti üzrə 379,1 milyon kVt/saat (İES-lərdə 216,8 milyon kVt/saat, SES-lərdə 117,4 milyon kVt/saat, GES-də 44,9 milyon kVt/saat), “Azərişıq” ASC üzrə külək elektrik stansiyalarında 56,7 milyon kVt/saat, müstəqil elektrik stansiyaları üzrə 1 milyard 915,7 milyon kVt/saat təşkil edib.