“Bahar” yatağı üzrə xam neft hasilat proqnozu yerinə yetirilməyib

Xəzər dənizinin Azərbaycan sektorunda yerləşən “Bahar” yatağı üzrə proqnoza qarşı xam neft hasilatı 75 % icra edilib.

“Report”un məlumatına görə, bu barədə Azərbaycan Dövlət Neft Fondunun (ARDNF) 2020-ci il büdcəsinin icrasına dair Hesablama Palatasının verdiyi rəydə deyilir.

Məlumata görə, neft hasilatı proqnozunun yerinə yetirilməməsi, COVID-19 pandemiya, dünya bazarında karbohidrogenlərin qiymətlərinin düşməsi səbəbindən OPEC + razılaşmasına uygun olaraq neft hasilatının məhdudlaşdırılması ilə əlaqədardır. Yüksək hasilatlı qaz quyularının geoloji-texniki səbəbdən dayanması "Bahar" yatağında qaz hasilatının aşağı olmasına səbəb olub.

"Bahar" yatağından karbohidrogenlərin satışından 150 min ABŞ dolları daxil olub ki, bu da proqnoza qarşı 100 % təşkil edib.

Xatırladaq ki, "Bahar" yatağı qaz-kondensat yatağıdır. Bakı şəhərindən 40 km cənub-şərq- cənuba doğru dənizdə yerləşir. "Bahar" qaz-kondensat yatağı 1969-cu ildən sənaye işlənməsinə verilib. Yataqda məhsuldar horizontlar Balaxanı, Fasilə, Qirməkiüstü qumlu, Qirməkialtı lay dəstələridir. İşlənmənin əvvəlindən 1 aprel 2011-ci il tarixinədək 203 quyu qazılıb. Toplanmış hasilat 1 yanvar 2011-ci il tarixinə 16,9 milyon ton kondensat, 12,9 milyard kubmetr qaz olub.

"Bahar Energy Limited" əməliyyat şirkətinin 100 % səhmləri ABŞ-ın "Greenfields Petroleum" şirkətinə məxsusdur.