“Azəriqaz”: “Dəm qazının yaranması halları nəzərəçarpacaq dərəcədə azalıb”

Azərbaycanda dəm qazının yaranması halları ötən illərlə müqayisədə nəzərəçarpacaq dərəcədə azalıb.

“Report”un məlumatına görə, bunu Dövlət Neft Şirkətinin (SOCAR) “Azəriqaz” İstehsalat Birliyinin Sağlamlıq, əməyin təhlükəsizliyi, ətraf mühitin mühafizəsi və keyfiyyətə nəzarət şöbəsinin rəisi İlkin Behbudov bu gün keçirilən “Açıq qapı” aksiyasında bildirib.

"Bu da son illər aparılan maarifləndirmə işləri ilə bağlıdır. Son 10 ilin statistik məlumatlarına əsasən, dəm qazı hallarının azı 95 %-i hamam otaqlarında baş verir. Əgər biz hamam otağından hadisənin mənbəyini uzaqlaşdırsaq, bu dəm qazından zəhərlənmə hallarının 95 %-i də yoxa çıxacaq”, - deyə o, qeyd edib.

"Azəriqaz" rəsmisi abonentlərə tövsiyə edib ki, qazla işləyən cihazları hamamda deyil, havaya çıxışı olan mətbəxdə quraşdırsınlar.