Azərbaycanın Beynəlxalq Enerji Forumuna üzvlüyü müzakirə edilib

Energetika naziri Pərviz Şahbazov “Bakı Enerji Həftəsi” tədbiri çərçivəsində ölkəmizdə səfərdə olan Beynəlxalq Enerji Forumunun baş katibi Cosep Makmoniqlı qəbul edib.

Bu barədə “Report”a Nazirlikdən məlumat verilib.

Energetika nazirinin müavini Samir Vəliyev Azərbaycanda liberal enerji bazarının formalaşdırılması, bu sahədə qanunvericilik bazasının təkmilləşdirilməsi və enerji keçidi prosesi haqqında danışaraq, “yaşıl” enerjidən istifadənin genişləndirilməsi sahəsində görülən işlər, xüsusilə işğaldan azad edilmiş ərazilərin bərpa olunan enerji potensialından istifadə istiqamətində qəbul edilmiş strateji hədəflər və atılmış addımlar haqqında məlumat verib. Hazırda enerji sahəsində baş verən dəyişikliklərin həm ölkələr arasında, həm də ölkələrlə beynəlxalq təşkilatlar arasında əməkdaşlığı tələb etdiyi vurğulanıb.

“Bakı Enerji Həftəsi”ni dünyada enerji sektorunda çətinliklərin yaşandığı belə bir vaxtda maraqlı tərəfləri bir araya toplayan beynəlxalq platforma kimi qiymətləndirən Baş katib Cosep Makmoniql dəvətə görə təşəkkür edib. Təmsil etdiyi təşkilatın fəaliyyət istiqamətləri və digər beynəlxalq qurumlardan fərqləri haqqında danışıb.

Görüş zamanı Azərbaycanın təşkilata üzvlüyü məsələsi ətrafında da fikir mübadiləsi aparılıb.