Azərbaycanda ilin əvvəlindən 15 kənd və 25 yaşayış massivinə təbii qaz verilib

Bu ilin yanvar ayından bu günə qədər Azərbaycanda 15 kənd və 25 yaşayış massivinə təbii qaz verilib.

“Report”un məlumatına görə, bunu Azərbaycan Dövlət Neft Şirkətinin (SOCAR) “Azəriqaz” İstehsalat Birliyinin İctimaiyyətlə əlaqələr şöbəsinin rəisi Eldəniz Vəliyev bu gün media və QHT nümayəndələri üçün keçirilən “Açıq qapı” aksiyası zamanı bildirib.

Onun sözlərinə görə, artıq həmin ərazilərdə təbii qazın verilişi ilə bağlı heç bir məhdudiyyət yoxdur: “Orada normal təzyiq və təhlükəsizlik qaydaları gözlənilir. Bu ərazilərdə hələlik qazın verilişi ilə bağlı heç bir problem yaşanmayıb”.

E. Vəliyev bildirib ki, hazırda 23 kənd və 19 yaşayış massivində təbii qazın verilməsi ilə bağlı işlər görülür: “Ölkənin 11 kənd və 14 yaşayış massivində isə qazın verilməsi ilə bağlı işlər tamamlanmaq üzrədir”.

O lavə edib ki, hər hansı fors-major hadisəsi baş verməsə, ilin sonuna kimi 59 kənd və 102 yaşayış massivinin qazlaşdırılmasının tam olaraq bitirilməsi nəzərdə tutulub.