Azərbaycanda elektrik enerjisi istehsalı 3 % artıb

Bu ilin yanvar-iyul aylarında Azərbaycanda elektrik enerjisinin istehsalı ötən ilin eyni dövrü ilə müqayisədə 2,6 % artaraq 16 milyard 278,1 milyon kVt/s olub.

Bu barədə “Report”a Energetika Nazirliyindən bildirilib.

Məlumata görə, son 1 ildə elektrik enerjisinin istehsalı istilik elektrik stansiyalarında 25,1 milyon kVt/s artaraq 14 milyard 893 milyon kVt/s, su elektrik stansiyalarında 286,5 milyon kVt/s artaraq 1 milyard 163,9 milyon kVt/s, digər mənbələr (KES, GES və BMTYZ) üzrə isə 8,4 milyon kVt/s artaraq 221,2 milyon kVt/s olub. Külək elektrik stansiyalarında 54 milyon kVt/s, günəş elektrik stansiyalarında 37,5 milyon kVt/s, "Təmiz Şəhər" ASC-yə məxsus Bərk Məişət Tullantılarının Yandırılması Zavodunda (BMTZ) isə 129,7 milyon kVt/s elektrik enerjisi istehsal edilib.