Azərbaycan Türkiyəyə qaz nəqlini 27 % azaldıb

Bu ilin mart ayında Azərbaycan Türkiyəyə 761,58 milyon kubmetr təbii qaz ixrac edib.

“Report” xəbər verir ki, bu barədə Türkiyənin Enerji Bazarını Tənzimləmə Qurumunun (Enerji Piyasası Düzenleme Kurumu – EPDK) hesabatında qeyd olunub.

Məlumata görə, bu, ötən ilin mart ayı ilə müqayisədə 29 % azdır.

Bununla da mart ayında Azərbaycan Türkiyəyə təbii qaz ixrac edən üçüncü ölkə olub. Bununla da Türkiyənin ümumilkdə idxal etdiyi təbii qazın 12,25 %- Azərbaycanın payına düşüb.

2022-ci ilin yanvar-mart aylarında isə Türkiyə Azərbaycandan 2 milyard 305,42 milyon kubmetr təbii qaz idxal edib ki, bu da 2021-ci ilin ilk rübünün göstəriciləri ilə müqayisədə 27 % azdır.

Ümumilikdə isə bu ilin mart ayında Türkiyə ümumilikdə 6 milyard 215,38 milyon kubmetr həcmində təbii qaz idxal edib ki, bu da 2021-ci ilin eyni ayının göstəriciləri ilə müqayisədə 6,66 % çoxdur.

Martda Rusiya Türkiyəyə qaz ixracına görə lider olub. Martda Rusiyadan Türkiyəyə 2 milyard 754,82 milyon kubmetr təbii qaz ixrac olunub. Bu, 2021-ci ilin mart ayı ilə müqayisədə 6,61 % çoxdur.

Martda ikinci yerdə ABŞ qərarlaşıb. Bu ölkə martda Türkiyəyə 896,99 milyon kubmetr qaz nəql edib. Bu, 2021-ci ilin mart ayı ilə müqayisədə 2,3 dəfə çoxdur.

Türkiyəyə Azərbaycanın “Şahdəniz” yatağından hasil edilən təbii qaz nəql edilir. Təbii qaz həcmləri Cənubi Qafqaz Boru Kəməri (Bakı-Tbilisi-Ərzurum) və Trans-Anadolu Təbii Qaz Kəməri (TANAP) vasitəsilə Türkiyə bazarına çatdırılır. Bakı-Tbilisi-Ərzurum kəməri ilə ilk qaz Türkiyə bazarına 2007-ci ildə daxil olub. TANAP vasitəsilə Türkiyəyə kommersiya qazının nəqlinə isə 2018-ci il iyunun 30-da başlanılıb.