Azərbaycan Türkiyəyə qaz nəqlini 23 %-dək azaldıb

Bu ilin aprel ayında Azərbaycan Türkiyəyə 733,92 milyon kubmetr təbii qaz ixrac edib.

“Report” xəbər verir ki, bu barədə Türkiyənin Enerji Bazarını Tənzimləmə Qurumunun (Enerji Piyasası Düzenleme Kurumu – EPDK) hesabatında qeyd olunub.

Məlumata görə, bu, ötən ilin aprel ayı ilə müqayisədə 4,83 % azdır.

Bununla da aprel ayında Azərbaycan Türkiyəyə təbii qaz ixrac edən üçüncü ölkə olub. Bununla da Türkiyənin ümumilkdə idxal etdiyi təbii qazın 18,04 %-i Azərbaycanın payına düşüb.

2022-ci ilin yanvar-aprel aylarında isə Türkiyə Azərbaycandan 3 milyard 39,34 milyon kubmetr təbii qaz idxal edib ki, bu da 2021-ci ilin ilk rübünün göstəriciləri ilə müqayisədə 22,6 % azdır.

Ümumilikdə isə bu ilin aprel ayında Türkiyə ümumilikdə 4 milyard 67,46 milyon kubmetr həcmində təbii qaz idxal edib ki, bu da 2021-ci ilin eyni ayının göstəriciləri ilə müqayisədə 13,92 % azdır.

Apreldə Rusiya Türkiyəyə qaz ixracına görə lider olub. Apreldə Rusiyadan Türkiyəyə 1 milyard 882,3 milyon kubmetr təbii qaz ixrac olunub. Bu, 2021-ci ilin aprel ayı ilə müqayisədə 24,97 % azdır.

Apreldə ikinci yerdə İran qərarlaşıb. Bu ölkə apreldə Türkiyəyə 837,42 milyon kubmetr qaz nəql edib. Bu, 2021-ci ilin aprel ayı ilə müqayisədə 3,41 % azdır.

Türkiyəyə Azərbaycanın “Şahdəniz” yatağından hasil edilən təbii qaz nəql edilir. Təbii qaz həcmləri Cənubi Qafqaz Boru Kəməri (Bakı-Tbilisi-Ərzurum) və Trans-Anadolu Təbii Qaz Kəməri (TANAP) vasitəsilə Türkiyə bazarına çatdırılır. Bakı-Tbilisi-Ərzurum kəməri ilə ilk qaz Türkiyə bazarına 2007-ci ildə daxil olub. TANAP vasitəsilə Türkiyəyə kommersiya qazının nəqlinə isə 2018-ci il iyunun 30-da başlanılıb.