"Anglo-Asian Mining” bu il üçün hasilat proqnozlarını açıqladı

Azərbaycanda qızıl, gümüş və mis hasilatı ilə məşğul olan Böyük Britaniyanın "Anglo-Asian Mining Plc." şirkəti 2021-ci il üçün “Gədəbəy” müqavilə ərazisi ilə bağlı proqnozunu açıqlayıb.

“Report” xəbər verir ki, bu barədə şirkətin məlumatında bildirilir.

Qeyd olunur ki, 2021-ci maliyyə ili üçün 48 min – 54 min unsiya qızıl hasilatı nəzərdə tutulur. Şirkətin 2020-ci maliyyə ilində faktiki qızıl hasilatı 56 864 unsiya təşkil edib.

Şirkət 2021-ci maliyyə ili üçün 2 500-2800 ton misin hasil ediləcəyini proqnozlaşdırır. Belə ki, 2020-ci maliyyə ilində şirkətin faktiki mis hasilatı 2 591 ton təşkil edib. Proqnozlaşdırılan istehsal 2021-ci il ərzində yeni bərpa olunan müqavilə sahələrindən hasilatı nəzərdə tutmur.

"Anglo-Asian Mining Plc." şirkəti hesab edir ki, 2021-ci maliyyə ili üçün 64 000-72 000 unsiya arasında ümumi qiymətli metal hasilatı mümkün olacaq. Qeyd edək ki, 2020-ci maliyyə ilində şirkətin bu sahədə faktiki istehsalı 67 249 unsiya təşkil edir.

Qeyd edək ki, “Anglo-Asian Mining” Azərbaycanda 1997-ci il avqustun 21-də imzalanmış PSA (Production Sharing Agreement/Hasilatın Pay Bölgüsü) tipli müqavilə çərçivəsində hasilatla məşğul olur. Müqavilədə Azərbaycanın payı 51 %, "Anglo-Asian Mining Plc." şirkətinin payı 49 % təşkil edir. İlk qızıl hasilatına ("Gədəbəy" yatağında) 2009-cu ildə başlanılıb. “Gədəbəy” bir-birinə inteqrasiya olunmuş mədənləri olan açıq mədəndir. Şirkət ərazidə yerləşən “Qadir” və “Gədəbəy” yatağından 50 km aralıdakı “Qoşa” yeraltı mədənində, yeni kəşf olunan "Uğur" yatağında da hasilatla məşğuldur.