Yuxarı

AÇG-də yeni platformanın inşası ilə bağlı altı müqavilə imzalanıb

​AÇG-də yeni platformanın inşası ilə bağlı altı müqavilə imzalanıb

Xəzərin Azərbaycan sektorunda yerləşən “Azəri-Çıraq-Dərinsulu Günəşli” (AÇG) yatağının işlənməsi çərçivəsində yeni platformanın inşası ilə bağlı 6 müqavilə imzalanıb.

“Report” xəbər verir ki, bu barədə blokun operatoru “BP-Azerbaijan” şirkəti məlumat yayıb.

“BP şirkəti “Azəri-Mərkəzi-Şərqi” (ACE) layihəsinin əsas müqavilələrin imzalanması ilə birlikdə sürətlə irəlilədiyini bildirməkdən məmnunluq duyur. Mühəndislik, tikinti və quraşdırma, layihələrin idarə edilməsi və digər xidmətləri əhatə edən müqavilələr 19 aprel 2019-cu ildə layihə üzrə elan olunmuş yekun investisiya qərarından sonra gələn addımdır. İmzalanan müqavilələr layihənin həyata keçirilməsi qrafikini müəyyən edir və yatağın işlənməsi üzrə bu irimiqyaslı layihədə iştirak edən çoxsaylı sahələrdə və istehsal sahələrində əldə olunmuş irəliləyişi tamamlayır”, - məlumatda qeyd edilib.

Yekun investisiya qərarı elan edildikdən sonra ACE layihəsi üzrə 6 müqavilə imzalanıb.

ACE platformasının dayaq bloku və ətək payalarının quraşdırılması üzrə müqavilə “BOS Shelf” MMC və “Star Gulf FZCO” şirkətlərindən təşkil olunmuş konsorsium ilə imzalanıb. Müqavilənin dəyəri 260 mln.dollara yaxındır. Müqavilə üzrə iş həcmi istehsal sexləri və quraşdırma ilə əlaqədar mühəndislik, boru yayma işləri, dayaq bloku və ətək payalarının hazırlanması və yığılması, quraşdırma sistemlərinin istismara verilməsi, qurğunun yüklənib göndərilməsi və dənizdə yerinə bərkidilməsindən ibarətdir.

Bu müqavilə üzrə bütün tikinti və quraşdırma işləri yerli resurslardan, o cümlədən işçi qüvvəsi və tikinti sahələrindən istifadə etməklə SOCAR-ın Heydər Əliyev adına Bakı Dərin Özüllər Zavodunda (BDÖZ) yerinə yetiriləcək. Tikinti işləri artıq başlamışdır və 2021-ci ildə başa çatdırılacağı gözlənilir.

İkinci müqavilə üzrə ACE platformasının üst modullarının hazırlanması və inteqrasiyası nəzərdə tutulur. Həmin müqavilə 2019-cu ilin iyulunda “Azfen” şirkəti ilə imzalanıb. Müqavilənin dəyəri 486 mln. dollardan artıqdır.

Bu müqavilə çərçivəsində işlər həcminə istehsal və quraşdırma mühəndisliyi, həmçinin platformanın üst modullarının hazırlanması, yığılması və birləşdirilməsi daxildir. Müqavilə üzrə nəzərdə tutulan işlərə ("National Oilwell Varco" şirkəti tərəfindən layihələndiriləcək) həmçinin yüngül bir qazma blokunun hazırlanması, istismara təhvil vermə işlərinə dəstək xidmətləri, yükləyib göndərmə, sazlama və dənizdə istismara təhvil vermə işlərinə dəstək də aiddir.

Üst modullar Bakı yaxınlığında Bibi-Heybətdəki istehsal sahəsində inşa olunacaq. Bu müqavilə üzrə tikinti işləri artıq başlayıb və 2022-ci ildə başa çatdırılacağı gözlənilir.

Üst modulların qazma qurğusu ilə əlaqədar layihələndirilmə, tədarük və tikintiyə nəzarət üzrə müqavilə ABŞ-ın "National Oilwell Varco" (NOV) şirkəti ilə imzalanıb. Bu müqavilənin dəyəri 151 mln. dollardan çoxdur.

Bu müqavilə çərçivəsində işlər həcminə müfəssəl layihələndirmə, mühəndislik təminatı və avadanlığın tədarükü və qazma qurğusunun Bakıya çatdırılması daxildir. İşlər həcmi həmçinin üst modullar və qazma qurğusu istehsalçısının tikinti işlərinə, o cümlədən qazma qurğusunun hazırlanması, birləşdirilməsi, sazlanması və istismara verilməsi ilə əlaqədar fəaliyyətə nəzarət daxildir.

Platformanın yaşayış blokları ilə əlaqədar layihələndirmə, satınalma və tikinti müqaviləsi İsveçin "Emtunga Solutions AB" şirkəti ilə imzalanıb. Bu müqavilənin dəyəri 34 mln. dollara yaxındır. Layihələndirmə, satınalma və tikinti ilə yanaşı, işlər həcminə yaşayış bloklarının inteqrasiyası və istismara təhvil verilməsinə texniki dəstək də daxildir.

Bu müqavilə üzrə işlər artıq başlayıb və 2022-ci ildə başa çatacağı gözlənilir. Yaşayış bloklarının yığılması və istismara verilməsi, Bakı yaxınlığında Bibi-Heybətdəki istehsal sahəsində, platformalar üçün üst modulların inşa olunacağı yerdə yerli resurslardan istifadə etməklə həyata keçiriləcək.

Layihələndirmə işlərinin icrası ilə əlaqədar müqavilə “SOCAR-KBR” MMC birgə müəssisə ilə imzalanıb. Müqavilənin dəyəri 76 mln. dollardan çoxdur.

Bu müqavilə üzrə işlər həcminə üst modullar, dayaq bloku və ətək payalarının layihələndirilməsi; AMŞ layihəsi üçün mövcud obyektlərin yenilənməsi işləri; sualtı qurğular üçün sistemin layihələndirilməsi üzrə mühəndislik işləri; layihənin idarə edilməsi - materialların idarə edilməsi, işçi münasibətlərinin idarə edilməsi, məlumatların idarə edilməsi; tədarük üzrə dəstək; keyfiyyətin idarə edilməsi və tikinti sahəsində dəstək daxildir.

Bu müqavilə üzrə işlər başlamışdır və SOCAR-KBR şirkətinin Böyük Britaniyadakı Leatherhead və Bakıdakı mühəndislik ofisləri vasitəsilə yerinə yetirilir.

Yüklərin idarə edilməsi xidmətləri ilə əlaqədar müqavilə Regional Çərçivə Sazişi çərçivəsində 2019-cu ilin avqustunda "Transglobal Projects" (TGP) MMC ilə imzalanıb.

Bu müqavilə çərçivəsində işlər həcminə materialların və avadanlıqların təchizatçıların obyektlərindən toplanması və Bakıdakı sahələrə çatdırılması, o cümlədən gömrük rəsmiləşdirməsi daxildir. Bu müqavilə üzrə göstəriləcək xidmətlər nəqliyyatın bütün növlərini, o cümlədən beynəlxalq və daxili avtomobil nəqliyyatı, çay gəmiləri, barjalar, dəniz nəqliyyatı, hava nəqliyyatı ilə daşıma haqqında razılaşmalar, yüklərin hava nəqliyyatı və dəmir yolu ilə daşınmasını əhatə edir.

BP şirkətinin layihələr üzrə vitse-prezidenti Yuan Drummond bildirib ki, BP operator olaraq ACE layihəsini etibarlı, səmərəli və qrafikə uyğun şəkildə həyata keçirmək üçün əsas müqavilələrin ilk paketinin imzalandığını elan etməkdən məmnundur: “AÇG sazişinin imzalanmasının 25-ci ildönümünü qeyd etdiyimiz zaman vurğulamaq yerinə düşər ki, AÇG üzrə əsas nailiyyətlərdən biri layihələrimizdə yerli resursların yüksək səviyyədə cəlb olunmasıdır. ACE layihəsi üzrə imzalanmış müqavilələr də bunu aydın şəkildə göstərir. İmzalanmış bu müqavilələr AÇG üzrə tərəfdaşların Azərbaycanın yerli resurslarından istifadəni optimallaşdırmaq öhdəliyini bir daha nümayiş etdirir. Bu il başlamış və 2022-ci ilin ortalarına qədər davam edəcək tikinti işləri yerli resurslardan istifadə etməklə ölkə daxilində yerinə yetirilir və pik səviyyədə tikinti işləri üçün 8000-ə qədər iş yerinin açılacağı gözlənilir”.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi