Yuxarı

"​Üzeyir Hacıbəylinin milli lad sistemi"nə həsr olunmuş I Respublika festivalının vaxtı dəyişdirilib

Festival iştirakçıları xalq musiqisi işləmələri və Azərbaycan ladları əsasında yazılmış bəstəkar pyesləri ifa etməlidirlər

Bakı. 19 mart. REPORT.AZ/ Üzeyir Hacıbəylinin anadan olmasının 130 illiyinə həsr olunmuş "Üzeyir Hacıbəylinin milli lad sistemi gənc musiqiçilərin tədris repertuarında" I Respublika festivalı martın 30-dan aprelin 4-dək keçiriləcək. Bu barədə "Report"a Təhsil Nazirliyindən məlumat verilib.

Festivalın musiqi və incəsənət məktəblərinin şagirdləri arasında bəstəkarlıq, instrumental ifaçılıq, xor və solo oxuma nominasiyaları üzrə keçirilməsi nəzərdə tutulub.

Yarışmanın təşkilində məqsəd böyüməkdə olan nəslin mənəvi simasının formalaşmasında mühüm rolu olan milli musiqi gen yaddaşının fəallaşdırılması, musiqi və incəsənət məktəbləri şagirdlərində öz milli köklərinə, Azərbaycan xalq sənətinin əsaslarına marağın artırılmasıdır.

Festivalın şərtlərinə əsasən, iştirakçılar xalq musiqisi işləmələri və Azərbaycan ladları əsasında yazılmış bəstəkar pyesləri ifa etməlidirlər. Hər pyesin ifasından əvvəl iştirakçı əsərdə istifadə olunan ladın səs qatarı və kadanslarını səsləndirməlidir.

Qaliblər münsiflər heyəti tərəfindən müəyyənləşdiriləcək. Mükafat yerlərini tutanlar “Festivalın laureatı” adına layiq görüləcəklər. Festivalın son günündə isə qaliblərin iştirakı ilə konsert keçiriləcək.

Qeyd edək ki, festivalın martın 24-dən 28-dək keçirilməsi nəzərdə tutulurdu.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi