Yuxarı
    Bağlamaq

    DİM: İxtisas qrupları üzrə qəbul planı ilə ərizələrin sayı arasında qeyri-tarazlıq var

    Dinlə
    © Report

    Bakı. 14 may. REPORT.AZ/ Azərbaycanda ixtisas qrupları üzrə qəbul planı ilə ərizələrin sayı arasında qeyri-tarazlıq var.

    “Report” xəbər verir ki, bu, Dövlət İmtahan Mərkəzinin dərc etdirdiyi “Abituriyent” jurnalının 12-ci sayında əksini tapıb.

    Məlumata görə, V qrupda ərizələrin, II qrupda isə plan yerlərinin nisbi çəkisi böyükdür.

    Ötən il I, II, III və IV ixtisas qruplarında müsabiqə vəziyyəti 2016-cı ilə nəzərən zəifləyib. Bunun əsas səbəbi bu ixtisas qruplarında qəbul planının artması və ərizə verənlərin azalmasıdır.

    V ixtisas qrupuna daxil olan ixtisaslar üzrə müsabiqə vəziyyətinin ötən ilə nəzərən yüksək olması həmin ildə bu qrupa ərizə verənlərin (qabiliyyət imtahanında iştirak etmək üçün qeydiyyatdan keçənlərin) sayının kəskin artması ilə əlaqədardır. Buna I–IV qruplardan hər hansı birinə ərizə verən abituriyentlərə həm də V qrupa ərizə vermək imkanının yaradılması təsir edib. Ötən il bu imkandan 31319 abituriyent yararlanıb. 2016-cı ildə bu göstərici 12774-ə bərabər idi.

    Məlumata görə, abituriyentlər xüsusi qabiliyyət tələb edən ixtisaslara qəbul olmaq üçün öncə V qrupa ərizə verməli və qabiliyyət imtahanı vermək üçün qabiliyyət imtahanı komissiyaları üzrə qeydiyyatdan keçməlidirlər. Bu cür qeydiyyatdan keçən abituriyentlərin sayı çox olsa da, qabiliyyət imtahanında iştirak edən abituriyentlərin sayı qeydiyyatdan keçənlərin sayından az olub.

    Bildirilib ki, hazırlıq səviyyəsi o qədər də yüksək olmayan abituriyentlər ali təhsil almaq imkanı əldə ediblər: "Bu baxımdan, gələcəkdə ali təhsil müəssisələrinə plan yerləri ayrılarkən mövcud reallıqlar nəzərə alınmalı, qəbul planında kəskin sıçrayışlar edilməməli, perspektivlər müəyyən olunmalı, bir sözlə, uğurlu qəbul planı siyasəti aparılmalıdır".

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi