Yuxarı
    Bağlamaq

    Azərbaycanda elm sahəsində ilk dəfə 33 yaşlı şəxs professor olub

    Akademik Xoşbəxt Yusifzadə gənc professoru təbrik edib

    Bakı. 17 iyul. REPORT.AZ/ Azərbaycan Prezidenti yanında Ali Attestasiya Komissiyasının 07 iyul 2017-ci il 13 nömrəli protokolu ilə Yusif Məmməd oğlu Babanlının professor elmi adı təsdiqlənib. 

    "Report" xəbər verir ki, Attestasiya Komissiyasının Rəyasət Heyətinin 12 iyul 2017-ci il tarixdə isə iclasında diplom sahibinə təqdim edilib.

    Məlumata görə, Ali Attestasiya Komissiyasının sədri Vəli Hüseynov, Rəyasət Heyətinin üzvlərindən akademik Xoşbəxt Yusifzadə, akademik Nizami Cəfərov Yusif Babanlını Respublikada ilk gənc olaraq professor elmi adı almağı münasibətilə təbrik ediblər. “Ən gənc professor”un dövlətin təhsil, idman, mədəni və ictimai-siyasi həyatında uğurlu rolunu, elmi-pedaqoji sahədə naliyyətlərini müsbət qiymətləndirərək ona uğurlar arzulayıblar.

    Əlamətdar hadisə ilə bağlı açıqlama verən prof. Yusif Babanlı qazandığı uğurdan danışıb: “Hər bir sahədə olduğu kimi, idman sahəsinin də nəzəriyyəsini öyrənmək və metodiki əsaslarla inkişaf etdirmək bu istiqamətdə fundamental institutun formalaşmasına və güclənməsinə öz töhfəsini verə bilər. Azərbaycanın idman ölkəsi kimi tanınmasının da 1 nömrəli səbəbi məhz bu amillərdir. Mən bu nailiyyəti təkcə özümün deyil, bütünlükdə elm və idman ictimaiyyətinin uğuru hesab edirəm”.

    Ən gənc professor nailiyyəti ilə bağlı qeyd edib ki, ümummilli lider Heydər Əliyevin Azərbaycanda elm və təhsillə, idman və digər sahələrlə bağlı siyasəti artıq real şəkildə özünün müsbət təzahürünü göstərməkdədir: "Ulu öndər bu sahələrə xüsusi həssaslıqla yanaşmış və daim qayğı göstərib. Məhz bu qayğının nəticəsidir ki, bu gün gənclər ölkənin elm-təhsil, mədəni, idman və ictimai-siyasi həyatında bacarıqlarını nümayiş etdirməkdədirlər. Bu da danılmaz faktdır ki, dahi öndər Heydər Əliyevin təhsil siyasəti konsepsiyasına əsasən gənc alimlərin yüksək səviyyədə yetişdirilməsi üçün demək olar ki, lazımi şərait yaradılıb. Bu gün gənc alim, professor, mütəxəssislərin yetişdirilməsi və onlara dəstək Azərbaycan xalqının xoş gələcəyinə xidmətin əsas istiqaməti kimi dövlətin və dövlət qurumlarının daima diqqətindədir. Bütün sahələrdə olduğu kimi, Azərbaycan elminin də inkişafı istiqamətində ümummilli lider Heydər Əliyevin siyasəti bu gün islahatların zəruriliyinə ciddi diqqət yetirən ölkə başçısı cənab İlham Əliyev tərəfindən uğurla davam etdirilir. Eyni zamanda Birinci vitse-prezidentimiz Mehriban xanım Əliyevanın da hər bir sahədə sağlam mühitin yaradılması ilə bağlı gördüyü genişmiqyaslı işlər hər bir gəncin özünü təsdiqi üçün geniş imkanlar yaradır. Biz gənc nəsil də Dövlət Başçımızın elm-təhsilə yüksək səviyyədə qayğı və diqqətini alqışlayır və bu inamlı, uğurlu siyasəti daim dəstəkləyirik”.

    Azərbaycanın ilk gənc professoru Babanlı Yusif Məmməd oğlu, 1984-cü ildə Naxçıvan MR, Ordubad rayonunda ziyalı ailəsində anadan olub. 1999-2001-ci illərdə Ordubad rayonunda orta məktəbdə təhsil alıb, 2001-2005-ci illərdə Azərbaycan Dövlət Bədən Tərbiyəsi və İdman Akademiyasının bakalavr, 2005-2008-ci illərdə magistr pilləsini fərqlənmə diplomu ilə bitirib. İkinci təhsilini Azərbaycan Respublikasının Prezidenti yanında Dövlət İdarəçilik Akademiyasının “Dövlət və bələdiyyə idarəetməsi” ixtisası üzrə alıb.

    Akademiyanın ictimai həyatında fəallığı ilə seçilən Y.Babanlı 2001-ci ilin noyabr ayından Azərbaycan Dövlət Bədən Tərbiyəsi və İdman Akademiyasının Tələbə Həmkarlar Təşkilatının sədri olub.

    O, 2001-ci ildən Boks Federasiyasının üzvü kimi yaxından fəaliyyət göstərməklə yanaşı Azərbaycan Respublikasının Boks idman növü üzrə “İdman ustası” adını alıb. 2009-cu ilin yanvar ayından Azərbaycan Boks Federasiyasının İcraiyyə Komitəsinin üzvü və Təşkilat Komitəsinin sədrdir. Həmçinin, Respublika dərəcəli hakim, Azərbaycan Respublikasının Fəxri Bədən tərbiyəsi və İdman işçisi adını alıb, 7 tələbəsi Avropa və dünya çempionu olub.

    Y.Babanlı 2005-2008-ci illərdə Azərbaycan Dövlət Bədən Tərbiyəsi və İdman Akademiyası Tələbə Gənclər Təşkilatının sədri vəzifəsində işləyərkən Akademiyanın digər ali məktəblər arasında nüfuzunun artmasında uğurlu fəaliyyətləri olmuşdur. Respublikanın ictimai-siyasi həyatında vətənpərvər və dövlətə sadiq gənc kimi fəaliyyətə 2002-ci ilin sentyabr ayından Yeni Azərbaycan Partiyasına (YAP) üzvülükdən başlayıb. YAP Respublika Gənclər Təşkilatı Şurasının üzvü və Nərimanov rayon YAP Gənclər Təşkilatının sədridir. YAP Respublika Gənclər Birliyinin İdarə Heyətinin üzvüdür. Həmçinin Prezident və Parlament seçkilərində YAP tərəfindən Respublika üzrə müşahidəçi olub.

    Azərbaycan Dövlət Bədən Tərbiyəsi və İdman Akademiyasının “Bədən tərbiyəsi və idmanın nəzəriyyəsi və metodikası” kafedrasında baş müəllim, dosent və professor vəzifəsində çalışıb.

    Doktorantura təhsilini 2011-2015-ci illərdə Azərbaycan Respublikası Təhsil Problemləri İnstitutunda almış və “İbtidai siniflərdə fiziki tərbiyənin texnologiyaları” adlı dissertasiyasını uğurla başa çatdıraraq Azərbaycan Dövlət Pedaqoji Universitetinin müdafiə şurasında müdafiə etmiş və Ali Attestasiya Komissiyasının qərarı ilə pedaqogika üzrə fəlsəfə doktoru elmi dərəcəsini alıb.

    2010-2016-ci illər Azərbaycan Dövlət Bədən Tərbiyəsi və İdman Akademiyasında prorektor vəzifəsində çalışmış, hal-hazırda isə rektorun Tələbə gənclərlə iş üzrə müşaviri və Akademiyanın Həmkarlar İttifaqı Komitəsinin sədridir.

    Azərbaycan Mədəniyyət İşçiləri Müstəqil Həmkarlar İttifaqının Respublika Komitəsinin rəyasət heyətinin, İctimai Televiziya və Radio Yayımları Şirkətinin Yayım Şurasının və Yazıçılar Birliyinin üzvüdür.

    Dövlət-hökumət qurumları, ictimai təşkilatlar tərəfindən bir çox Fəxri fərman, Diplom və medallarla təltif edilib. Azərbaycan Həmkarlar İttifaqında xidmətlərinə görə AHİK-in İcraiyyə Komitəsinin medalı ilə, Azərbaycan Mədəniyyət işçiləri Müstəqil Həmkarlar İttifaqının 110 illik yubileyində ittifaqda xidmətlərinə görə medalla və Respublika Vetiranlar Təşkilatı tərəfindən Cəmşid Naxçıvanski adına medalla təltif olunub.

    Səksən elmi məqalənin, 9 metodik vəsaitin, 6 dərs vəsaitin, 7 monoqrafiyanın müəllifi olan gənc professor Respublika və Beynəlxalq səviyyəli elmi-praktik konfranslarda yaxından iştirak etmiş və dövrü mətbuatda 100-ə yaxın məqaləsi dərc edilib.

    Azərbaycan Silahlı Qüvvələri sıralarında həqiqi hərbi xidmət keçib. Ailəlidir. Bir övladı var.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi