Yuxarı
    Bağlamaq

    AMEA-nın Zoologiya İnstitutunda yeni şöbə yaradılacaq

    Bununla bağlı bağlı AMEA Rəyasət Heyəti qarşısında vəsatət qaldırılması qərara alınıb

    Bakı. 12 iyun. REPORT.AZ/ Azərbaycan Milli Elmlər Akademiyasının (AMEA) Biologiya və Tibb Elmləri Bölməsinin Ümumi yığıncağı keçirilib. 

    Akademiyadan “Report”a verilən məlumata görə, yığıncaqda bölmə üzrə AMEA-nın həqiqi və müxbir üzvləri, elmi müəssisələrin direktorları iştirak ediblər.

    Tədbir AMEA Biologiya və Tibb Elmləri Bölməsinin (BTEB) akademik-katibi, akademik Əhliman Əmiraslanovun giriş sözü ilə başlayıb, gündəlikdə olan məsələlər iştirakçıların diqqətinə çatdırılıb.

    Əvvəlcə akademik Əhliman Əmiraslanov son seçkilərdə BTEB üzrə AMEA-nın yeni seçilmiş həqiqi və müxbir üzvlərini təbrik edib, gül dəstələri təqdim edib.

    Ümumi yığıncaqda Torpaqşünaslıq və Aqrokimya İnstitutunun Üzvi gübrələr laboratoriyasının müdiri, aqrar elmlər üzrə elmlər doktoru Paşa Zamanov elmdə göstərdiyi xidmətlərə görə və 90 illik yubileyi münasibətilə AMEA BTEB-in Fəxri Fərmanı ilə mükafatlandırılıb.

    Gündəlikdə olan növbəti məsələ yubileylərin keçirilməsi barədə olub. AMEA-nın müxbir üzvləri İbrahim Əzizov və Əlövsət Quliyevin 70 illiyi, Botanika İnstitutunun elmi işlər üzrə direktor müavini, biologiya üzrə elmlər doktoru Eldar Novruzovun 75 illiyi, Zoologiya İnstitutunun Teriologiya laboratoriyasının müdiri, biologiya üzrə elmlər doktoru Qiyas Quliyevin 70 illiyi və Fiziologiya İnstitutunun Hüceyrənin morfofunksional plastikliyi laboratoriyasının müdiri, biologiya üzrə elmlər doktoru Fəxrəddin Əskərovun 80 illiyi haqqında institut rəhbərlərinin müraciətləri ətrafında müzakirələr aparılıb.

    İclasda bir sıra kadr məsələlərinə baxılıb, eləcə də AMEA Zoologiya İnstitutunda Beynəlxalq əlaqələr şöbəsinin yaradılması ilə bağlı AMEA Rəyasət Heyəti qarşısında vəsatət qaldırılması qərara alınıb. Sonra AMEA Genetik Ehtiyatlar İnstitutunun 3 əməkdaşının Çin və ABŞ-nin tanınmış universitetlərinə ezam olunması ətrafında fikirlər səsləndirilib və müvafiq qərarlar qəbul edilib.

    Ümumi yığıncaqda yeni təsis olunmuş "AMEA-nın professoru" elmi adına namizədliyini təqdim edən şəxslərin adları diqqətə çatdırılıb. Namizədlərin sənədləri ilə tanışlıqdan sonra elmi və pedaqoji fəaliyyətlərinə dair müzakirələr aparılıb.

    Bölmənin akademik-katibi, akademik Əhliman Əmiraslanov "AMEA-nın professoru" elmi adının verilməsi məqsədilə keçirilən seçkidə biologiya və tibb elmləri üzrə 4 namizədin iştirak etdiyini bildirib. Akademik Ə.Əmiraslanov qeyd edib ki, bu ada layiq görüləcək alimlərin Akademiyada baş verən proseslərdə daha yaxından iştirakı təmin ediləcək. Sonra büro üzvləri adları qeyd edilən namizədlər barədə fikirlərini səsləndiriblər.

    Sonda gizli səsvermə yolu ilə seçki keçirilib və nəticədə namizədlərin hamısının adı AMEA Rəyasət Heyətinə təqdim ediləcək siyahıya daxil olunub.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi