Şimali Kipr və Azərbaycandan şəhid ailələri QHT-lər xətti ilə qarşılıqlı səfərlərə başlayır

Bu gün “Zəfər" Şəhid Ailələrinə Dəstək İctimai Birliyinin təşkilatçılığı ilə “Türk dünyasının şəhid ailələri arasında əlaqələrin inkişafı” adlı konfrans keçirilib.

"Report"un məlumatına görə, tədbir Dövlət Təhlükəsizliyi Xidmətinin (DTX) Mədəniyyət Mərkəzinin "Bənövşə" uşaq xorunun ifasında Azərbaycanın Dövlət Himninin və Türkiyənin “İstiqlal" marşının səsləndirilməsi, türk dünyası şəhidlərinin əziz xatirəsinin bir dəqiqəlik sükutla yad edilməsi ilə başlayıb.

Şimali Kipr Türk Cümhuriyyətinin prezidenti Ersin Tatar konfrans iştirakçılarına videomüraciət ünvanlayıb.

“Zəfər” Şəhid Ailələrinə Dəstək İctimai Birliyinin sədri Sevinc Alızadə bildirib ki, qardaş Şimali Kipr Türk Cümhuriyyətindən ilk dəfə şəhid ailələrinin Azərbaycana səfəri iki ölkə arasında uğurla inkişaf edən əlaqələrdə mühüm körpüdür. O, layihəyə dəstək verdiyi üçün Azərbaycan Respublikasının QHT-lərə
Dövlət Dəstəyi Agentliyinə təşəkkür edib: “Türk dünyası ilə əlaqədar getdikcə genişlənir. Biz bir ailəyik, kökümüz, dilimiz, dinimiz, yolumuz eynidir. Birlikdə daha güclüyük! Şəhidlərimiz də bir-birimiz üçün müqəddəsdir. Onları sonsuz sevgi, hörmət və ehtiramla anırıq”.

S.Alızadə onu da deyib ki, son vaxtlar nümunəvi QHT layihələri bir-birini əvəz edir: “Bu, Azərbaycan vətəndaş cəmiyyətinin həyatında yeni inkişaf mərhələsinə keçidə işarədir”.

ŞKTC-nin “Şəhid Ailələri və Qazilər Dərnəyi”nin sədri Gürsel Benan bildirib ki, belə ortaq layihələr şəhid ailələrinin sevincini artırır, kədərini azaldır.

QHT-lərə Dövlət Dəstəyi Agentliyinin icraçı direktoru Aygün Əliyeva qeyd edib ki, Agentlik bu cür nümunəvi layihələrin donoru olmaqdan böyük məmnunluq duyur: “Agentlik türk dünyası ilə əlaqələrin daha da genişləndirilməsi üçün uğurlu layihələri bundan sonra da dəstəkləyəcək”.

Azərbaycanın Milli Qəhrəmanı, şəhid general-mayor Polad Həşimovun həyat yoldaşı Ofeliya Salmanova türk dünyasının haqlı olaraq qəhrəman övladları ilə fəxr etdiyini vurğulayıb.

Şimali Kipr Türk Respublikası Prezidentinin QHT-lərlə əlaqələr üzrə müşaviri Latif Akça iki qardaş ölkə arasında münasibətlərin inkişafında QHT-lərin vacib rol oynadığını qeyd edib.

Şimali Kipr Türk Respublikasının Bakı nümayəndəliyinin rəhbəri Ufuk Turqaner, Azərbaycan-ŞKTR Dostluq Cəmiyyətinin sədri Orxan Həsənoğlu, deputatlar Ceyhun Məmmədov, Tamam Cəfərova və digərləri çıxışlarında bu kimi tədbirlərin əhəmiyyətini vurğulayıblar.

Tədbirin sonunda “Zəfər” Şəhid Ailələrinə Dəstək İctimai Birliyi ilə Şimali Kipr Türk Respublikasının İstanbul Texniki Universitetinin Şimali Kipr filialı və Girne Amerikan Universiteti arasında əməkdaşlıq protokolları imzalanıb. Bu protokollar bu ilin iyul ayında Azərbaycandan 10 şəhid övladının İstanbul Texnik Universitetinin Şimali Kipr filialında, 20 nəfər şəhid övladının isə Girne Amerikan Universitetində 14 gün yay məktəblərində iştirakını nəzərdə tutur. Azərbaycandan olan şəhid övladlarının yay məktəbləri üçün bütün xərcləri qeyd olunan ali məktəblər ödəyəcək.

Heyətin tərkibində iştirak edən İstanbul Texnik Universitetinin Şimali Kipr filialının rektoru Dursun Koç, Girne Amerikan Universitetinin dekanı Boğaçhan Bayülken Qarabağın azadlığa qovuşmasının bütün türk dünyasını fərəhləndirdiyini bildiriblər.

Şəhid ailələrindən ibarət heyət Azərbaycana səfər çərçivəsində Şamaxı, Şuşa, Xocalı və Ağdamda da olacaq.