Markerlər martın əvvəlində keçirilən buraxılış imtahanlarında 1,7 milyondan çox tapşırıq qiymətləndirib

Markerlər martın 2-də və 9-da keçirilən tam (11 illik) orta təhsil səviyyəsi üzrə buraxılış imtahanlarında 1,7 milyondan çox tapşırıq üzrə qiymətləndirmə aparıb.

“Report” xəbər verir ki, bunu Dövlət İmtahan Mərkəzinin Bacarıqların, vərdişlərin qiymətləndirilməsi və markerlərlə iş şöbəsinin müdiri Aydın Qasımov deyib.

O bildirib ki, bir tapşırığın iki marker tərəfindən yoxlanıldığını nəzərə alsaq 3,5 milyona yaxın qiymətləndirmə həyata keçirildiyi məlum olur:

“Hər tapşırıq üzrə yazı işi iki ayrı marker tərəfindən qiymətləndirilir. Bu hər hansı işarələmə vasitəsilə yazı işini tanıtması cəhdlərini sıfra salır və bu qayda ilə hər şagirdin ümumi işinin ən az 20 müxtəlif marker tərəfindən yoxlanılır”.