Kolleclərin boş qalan plan yerlərinə qəbulun nəticələri elan olunub

Bakı. 4 sentyabr. REPORT.AZ/ Dövlət İmtahan Mərkəzi 2018/2019-cu tədris ili üçün ümumi (9 illik) orta təhsil bazasında orta ixtisas təhsili müəssisələrinin boş qalan plan yerlərinə qəbul olmaq üçün keçirilən müsabiqənin nəticələrini elan edib.

"Report" xəbər verir ki, abituriyentlər müsabiqənin nəticələri haqqında məlumatı DİM-in internet saytından və ya mobil operatorlar (Azercell, Bakcell, Nar) vasitəsilə “iş nömrəsi”ni 7727 nömrəsinə göndərməklə öyrənə bilərlər.

Qeyd edək ki, boş qalan 2429 plan yerinin müsabiqəsində iştirak etmək üçün 2219 abituriyent ərizə təqdim edib. Onlardan 1799 abituriyent orta ixtisas təhsili müəssisələrinə qəbul olub.

Qəbul olunanlar sentyabrın 5-dən 12-dək (saat 9:00-dan 17:00-dək) sənədlərini daxil olduqları təhsil müəssisəsinə təqdim etməklə qeydiyyatdan keçməlidirlər.

Müəyyən olunmuş müddətdə qeydiyyatdan keçməmək abituriyentin müvafiq ixtisasa yerləşdirilməsindən imtina etməsi kimi qiymətləndiriləcək və onun qəbul olmaq haqqında əmri orta ixtisas təhsil müəssisəsinə göndərilməyəcək.