“Ən yaxşı yazı” müsabiqəsinin qalibləri mükafatlandırılıb

Ulu öndər Heydər Əliyevin xatirəsinə həsr olunan “Şuşa bizim milli rəmzimizdir” mövzusunda keçirilən “Ən yaxşı yazı” müsabiqəsinin qaliblərinin mükafatlandırılması mərasimi keçirilib.

"Report" xəbər verir ki, müsabiqəni Ailə, Qadın və Uşaq Problemləri üzrə Dövlət Komitəsi təşkil edib.

Tədbirin əvvəlində Azərbaycan Dövlət Himni səsləndirilib.

Daha sonra Dövlət Komitəsinin sədri Bahar Muradova çıxış edərək Azərbaycanın Qarabağda qazandığı tarixi qələbədən danışıb: "Dünyaya yeni Azərbaycan tanıtmalıyıq. Bu gün Azərbaycan adlı Günəş Qafqaz dağlarından dünyaya boylanır. Hər kəs Vətən üçün canını verməyə, öz sahəsində xidmət göstərməyə hazırdır. Bugünkü Azərbaycan ulu öndər Heydər Əliyevin şah əsəridir. Hamı bunu dərk edir. Onun siyasəti nəticəsində Azərbaycan inkişaf edir. Artıq dünya Azərbaycanı yeni məzmun və xarakterdə qəbul etməyə başlayıb. Gənclər bizim necə böyük sərvətə malik olduğumuzu dərk etməlidir".

Hakim Yeni Azərbaycan Partiyasının Veteranlar Şurasının sədri Arif Rəhimzadə ümummilli lider Heydər Əliyevin siyasəti barədə məlumat verib. O bildirib ki, ulu öndər gənc yaşlarından başlayaraq Azərbaycana xidmət edib: "Bu tədbir Azərbaycanda fəal gənclərin olması baxımından vacibdir. Arzu edirəm ki, burada iştirak edənlər və etməyənlər fəal olsunlar".

Sonda müsabiqənin qaliblərinə mükafat və hədiyyələr təqdim edilib.

Xatırladaq ki, müsabiqə 1-30 aprel tarixlərində davam edib.