“Azərbaycan dilinin inkişafında Nəsimi poeziyasının rolu” mövzusunda elmi sessiya keçirilib

Azərbaycan Milli Elmlər Akademiyasının (AMEA) Nəsimi adına Dilçilik İnstitutunda “Azərbaycan dilinin inkişafında Nəsimi poeziyasının rolu” mövzusunda elmi sessiya keçirilib.

"Report"un məlumatına görə, elmi sessiyada çıxış edən Dilçilik İnstitutunun direktoru, akademik Möhsün Nağısoylu İmadəddin Nəsiminin Azərbaycan ədəbi dilinin banisi olduğunu xatırladıb: "Şərqin dahi şairləri kimi, Nəsimi də filosof şair idi. Onun fəlsəfi qəzəllərinin böyük bir hissəsi aydın, səlis, əsl xalq dili sözləri ilə zəngin olduğundan sadə xalq da onu aydın başa düşürdü. Nəsimi Ana dilinin təbliğatçısı kimi fəlsəfi ideya və məsləkinin öz xalqına tam çatması üçün bu yoldan bir vasitə kimi istifadə edirdi. Əslində Nəsiminin təbliğatçısı olduğu hürufiliyin də rüşeymində xalq və xalqçılıq dururdu".

M.Nağısoylu vurğulayıb ki, Prezident İlham Əliyevin böyük Azərbaycan şairi İmadəddin Nəsiminin 650 illik yubileyi münasibətilə 2019-cu ilin ölkəmizdə “Nəsimi ili” elan edilməsi haqqında sərəncamı xalqımızın mədəni həyatında çox əlamətdar və təqdirəlayiq hadisədir: "Hesab edirik ki, bu sərəncam ölkə Prezidentinin, Azərbaycan dövlətinin bədii sözə və ədəbiyyatımıza, incəsənət və mədəniyyətimizə verdiyi böyük dəyər və qayğının daha bir bariz nümunəsidir".

Akademik qeyd edib ki, Azərbaycan xalqının ümummilli lideri Heydər Əliyev hələ ölkəmizə rəhbərliyinin birinci dönəmində (1969-1982) elm və mədəniyyətə, ədəbiyyat və incəsənətə, xüsusilə də xalqımızın mənəvi sərvəti olan ana dilimizə böyük diqqət və qayğı ilə yanaşaraq bu yöndə bir sıra məqsədyönlü tədbirlər həyata keçirib: "Həmin tədbirlər sırasında məhz ulu öndərin təşəbbüsü ilə 1973-cü ildə böyük söz ustası İmadəddin Nəsiminin 600 illik yubileyinin UNESCO-nun tədbirlər planına daxil edilməsi və ölkəmizdə böyük təntənə ilə qeyd olunması xüsusi yer tutur. Məlum olduğu kimi, həmin yubiley tədbirlərinin davamı olaraq 1979-cu ildə Bakının mərkəzində İmadəddin Nəsiminin möhtəşəm heykəli ucaldıldı, şair haqqında məşhur bədii film çəkildi, eləcə də böyük söz ustadının əsərləri həm doğma ana dilində, bəziləri isə bir sıra xarici dillərdə nəfis şəkildə nəşr olundu".

Sonra professor Sevil Mehdiyeva “Nəsimi şeirlərində Azərbaycan dilinin xəlqiliyi”, dosent Qüdsiyyə Qəmbərova “Nəsimi dilində söz yaradıcılığı”, dosent Elçin Məmmədov “Nəsimi dilində arxaukləşmiş feillər və isimlər”, dosent Türkan Əskərova “Nəsimi poeziyasında frazeologizmlər” adlı məruzələrlə çıxış ediblər.