“Ana dilimiz milli varlığımızdır” müsabiqəsinin qalibləri məlum olub

Bakı. 28 dekabr. REPORT.AZ/ Azərbaycan Milli Elmlər Akademiyasının (AMEA) Rəyasət Heyətində Orfoqrafiya Komissiyasının iclası keçirilib.

"Report" xəbər verir ki, AMEA-nın prezidenti, akademik Akif Əlizadə iclası açaraq ötən illər ərzində Azərbaycan dilinin dövlət dili kimi qorunması və təkmilləşdirilməsi məqsədilə müxtəlif qanun, fərman və sərəncamların verildiyini deyib. Qeyd edib ki, bu istiqamətdə fəaliyyəti davam etdirmək və Azərbaycan dilinin işlənmə imkanlarını daha da genişləndirmək məqsədilə Prezident İlham Əliyev “Azərbaycan Respublikasının Dövlət Dil Komissiyasının yeni tərkibinin təsdiq edilməsi haqqında” Sərəncam imzalayıb.

İclasda AMEA Humanitar Elmlər Bölməsinin akademik-katibi, akademik Teymur Kərimli “Ana dilimiz – milli varlığımızdır” müsabiqəsinin yekunları haqqında danışıb. Bildirib ki, akademik Akif Əlizadənin 22 sentyabr 2017-ci il tarixli sərəncamı ilə 23-25 oktyabr 2017-ci il tarixlərində AMEA-nın magistrant və doktorantları arasında müsabiqə keçirilib.

I yer üzrə 1 nəfər (1500 manat), II yer üzrə 3 nəfər (1200 manat), III yer üzrə 4 nəfər (1000 manat) qalib olub. 

Akademik Akif Əlizadə müsabiqə qaliblərinin adlarını açıqlayıb. Müsabiqənin qalibi Dilçilik İnstitutunun doktorantı, İctimaiyyətlə əlaqələr şöbəsinin müdiri Təranə Şükürlü olub.

Qaliblərə diplom, müsabiqə iştirakçılarına isə sertifikat təqdim olunub.
Sonra AMEA-nın vitse prezidenti, akademik İsa Həbibbəyli “Azərbaycan Respublikası Prezidentinin “Azərbaycan Respublikasının Dövlət Dili Komissiyasının yeni tərkibinin təsdiq edilməsi haqqında” Sərəncamı və qarşıda duran vəzifələr” mövzusunda çıxış edib. Akademik dilimizin keçdiyi tarixi mərhələlərdən söz açıb. Dilimizin saflığının qorunması, ədəbi dilin daha da zənginləşdirilməsi və tətbiqinin genişləndirilməsi istiqamətində görülən işlərdən danışıb. Qeyd edib ki, sözügedən Sərəncam zamanında imzalanmış vacib bir sənəd olmaq etibarı ilə Azərbaycan dilinin qorunması və milli dilçilik elminin inkişafına töhfə kimi qiymətləndirmək olar.

Tədbirdə Nəsimi adına Dilçilik İnstitutunun direktoru, akademik Möhsün Nağısoylu Azərbaycan dilinin yeni orfoqrafiya qaydaları haqqında danışıb. Akademik bildirib ki, adıçəkilən Sərəncamla bağlı bir sıra işlərin həyata keçirilməsi nəzərdə tutulur ki, onlardan biri də müasir elmi tələblər səviyyəsində Azərbaycan dilinin orfoqrafiya lüğətinin yeni akademik nəşrinin hazırlanmasıdır.
Qeyd edib ki, Dövlət dili haqqında Azərbaycan Respublikasının qanununda yer alan orfoqrafiya lüğətinin beş ildən bir nəşr olunması haqqında maddəyə uyğun olaraq, Dilçilik İnstitutunun əməkdaşları orfoqrafiya lüğətinin yeni nəşrinin hazırlanması üzərində çalışırlar. Bu məqsədlə institutda işçi qrupu yaradıldığını söyləyən M.Nağısoylu Azərbaycan dilinin yeni orfoqrafiya lüğətinin qaydalarının layihə şəklində hazırlandığını vurğulayıb və burada yer alan yenilikləri diqqətə çatdırıb.
Daha sonra iclasda dövlət dili siyasəti və qarşıda duran vəzifələrə dair müakirə aparılıb.