Umayra Tağıyeva: "Bölgələrdə aprelin 20-dən 22-dək hava yağıntılı olacaq"

"Son günlər ölkə ərazisində cənub küləyi fonunda hava şəraiti mülayim, əsasən yağmursuz keçir. Havanın temperaturu normadan 2-4,5° yüksək olub".

Bunu "Report"a açıqlamasında Ekologiya və Təbii Sərvətlər Nazirliyinin Milli Hidrometeorologiya Xidmətinin rəisi Umayra Tağıyeva bildirib.

Onun sözlərinə görə, gün ərzində sabit hava şəraiti davam edəcək: "Lakin cənub-qərb küləyi arabir güclənəcək, aprelin 20-də isə şimal-qərb küləyi ilə əvəz olunacaq, axşam və 21-də güclənəcək. Bölgələrdə aprelin 20-si gündüzdən 22-dək hava arabir yağıntılı olacaq. Əsasən şimal və qərb rayonlarında intensivləşəcəyi, şimşək çaxacağı, dolu düşəcəyi, yüksək dağlıq ərazilərdə qar yağacağı ehtimalı var. Qərb küləyi arabir 15-20 m/s, ayrı-ayrı yerlərdə arabir 25-30 m/s-dək güclənəcək".

U.Tağıyeva deyib ki, aprelin 20-də atmosfer təzyiqinin təzadlı dəyişməsi fonunda mülayim gilavar küləyinin 20-si axşamdan 21-i gündüzədək güclü xəzri küləyi ilə əvəz olunacağı gözlənilir, bu da meteohəssas insanlar üçün əsasən əlverişsizdir.