Sumqayıt çayı üzərindəki körpünün altında kimyəvi maddələr tapılıb

Bakı. 31 avqust. REPORT.AZ/ Sumqayıt çayı üzərindəki körpünün altında kimyəvi maddələr aşkar olunub.

Ekologiya və Təbii Sərvətlər Nazirliyinin (ETSN) Mətbuat xidmətindən “Report”a verilən məlumata görə, nazirliyin “Qaynar xətt”inə Sumqayıt çayı üzərindəki körpünün altına kimyəvi maddələr olan kisələrin atılması ilə bağlı məlumat daxil olub. Məlumat qurumun 4 saylı Regional Ekologiya və Təbii Sərvətlər İdarəsinin əməkdaşları tərəfindən yerində araşdırılıb və fakt təsdiqini tapıb.

Araşdırma zamanı sözügedən ərazidə hər birinin çəkisi 25.2 kiloqram olan 300-ə yaxın ammonium-bi-flüorid duzu ilə dolu kisələrin atıldığı məlum olub. ETSN-in Təhlükəli Tullantıların İdarə Olunması üzrə Milli Mərkəzinin əməkdaşları tərəfindən kisələr ərazidən yığışdırılaraq təhlükəli tullantılar poliqonuna daşınıb.

Kisələri əraziyə atan şəxslərin kimliyinin müəyyənləşdirilməsi məqsədilə Sumqayıt şəhər Polis İdarəsinə məktubla müraciət edilib.