Azərbaycanın nümayəndə heyəti Stokholmda beynəlxalq konfransda iştirak edir

Ümumdünya Ətraf Mühitin Mühafizəsi Günü ərəfəsində İsveçin paytaxtı Stokholmda keçirilən beynəlxalq konfransda Azərbaycanı ekologiya və təbii sərvətlər nazirinin müavini Rauf Hacıyevin başçılıq etdiyi nümayəndə heyəti təmsil edir.

Ekologiya və Təbii Sərvətlər Nazirliyinin Mətbuat Xidmətindən "Report"a verilən məlumata görə, Azərbaycanın nümayəndə heyətinin rəhbəri R.Hacıyev konfransda çıxış edərək ölkəmizin ətraf mühitin mühafizəsi, iqlim dəyişmələrinin təsirlərinin yumşaldılması sahəsində milli və beynəlxalq səviyyədə gördüyü işlər, işğaldan azad edilmiş ərazilərdə Ermənistan tərəfindən törədilən ekoloji cinayətlər və bu ərazilərin bərpası ilə bağlı görülən tədbirlər barədə məlumat verib.

Səfər çərçivəsində Azərbaycanın nümayəndə heyəti BMT-nin Bazel, Rotterdam və Stokholm Konvensiyalarının Tərəflər Konfransının Yüksək Səviyyəli Seqmentində çıxış edib, eyni zamanda beynəlxalq təşkilatlarla ikitərəfli görüşlər keçirib.