Yuxarı

Azərbaycanda Qırmızı Kitaba düşmüş quşları satan şəxs cəzalandırılıb

Qanunsuz ov hallarının qarşısını almaq məqsədilə reydlər davam etdirilir

Bakı. 13 noyabr. REPORT.AZ/ Ekologiya və Təbii Sərvətlər və Daxili İşlər Nazirliklərinin aidiyyəti qurumlarının əməkdaşları tərəfindən “Ovçuluq haqqında” qanunun tələblərinə əməl olunması, eləcə də ovlanmış çöl quşlarının və heyvanların qeyri-qanuni satışının qarşısının alınması məqsədilə ölkə ərazisində növbəti reydlər keçirilib. "Report" xəbər verir ki, bu barədə nazirliyin mətbuat xidmətinin yaydığı məlumatda bildirilib. Azərbaycanda keçirilən reyd zamanı Qusar rayonunun Nəcəfkənd kəndi ərazisində ov edən kənd sakini Edik Ağaverdiyev saxlanılıb. Ondan 1 ov tüfəngi, 2 patron götürülərək barəsində qanuna müvafiq qaydada akt və protokol tərtib edilib. Qanun pozucusu 1000 manat məbləğində cərimə olunub.

Qəbələ rayonunun Əmirvan kəndi ərazisində keçirilmiş reyd zamanı ov edən naməlum şəxs saxlanılıb. Faktla bağlı qanuna müvafiq qaydada akt tərtib olunaraq həmin şəxsdən 1 ov tüfəngi, 3 patron götürülüb. Sənəd təqdim etməyən qanun pozucusunun şəxsiyyətinin müəyyən edilməsi və barəsində qanunvericiliyə uyğun tədbir görülməsi üçün aidiyyəti rayon polis şöbəsinə müraciət edilib. 

Mahmudçala ovçuluq təsərrüfatının ərazisində keçirilmiş reyd zamanı qanunsuz ovla məşğul olan 3 nəfər saxlanılıb. Qanunsuz ov edən Masallı rayon sakinləri Ramil Mirzəyev, Kamil Məmmədov və Pərviz Əsgərovdan 3 ov tüfəngi, 72 patron götürülüb. Qanun pozucuları barəsində akt və protokollar tərtib edilərək, hər biri 1000 manat məbləğində cərimə olunub.

İmişli rayon Qaradonlu kəndi ərazisində keçirilmiş reyd zamanı ov edən kənd sakini Mirzəli Rəhimov saxlanılaraq ondan 1 ov tüfəngi, 2 patron götürülüb. Faktla bağlı akt və protokol tərtib edilərək qanun pozucusu 1000 manat məbləğində cərimə edilib.

Şamaxı rayonu Kərkəng kəndi ərazisində ov edən Şamaxı rayon Karxan kənd sakinləri Nizami İsayev və Orxan İsayev saxlanılaraq onlardan 2 ov tüfəngi və 4 patron götürülüb. Hər iki fakt üzrə qanuna müvafiq qaydada akt və protokollar tərtib edilərək, qanun pozucularının hər biri 1000 manat məbləğində cərimə olunub.

Hirkan Milli Parkının əməkdaşları tərəfindən Parkın ərazisində ov edən naməlum şəxs saxlanılıb. Ondan 1 ov tüfəngi, 10 patron götürülərək qanuna müfaviq qaydada akt tərtib olunub. Sənəd təqdim etməyən qanun pozucusunun şəxsiyyətinin müəyyən edilməsi və qanunvericiliyə uyğun tədbir görülməsi üçün aidiyyəti rayon polis şöbəsinə müraciət edilib.
Eyni zamanda, keçirimiş reydlər zamanı ov quşlarının satışının təşkil edildiyi də aşkarlanıb. Belə ki, Hacıqabul rayonu Padarçöl ərazisində Padar kənd sakini Ələddin Ağayev adı “Azərbaycan Respublikasının Qırmızı Kitab”ına düşmüş 2 bəzgək quşunu satarkən saxlanılıb və barəsində qanuna müvafiq qaydada akt və protokol tərtib olunub. Faktla bağlı qanun pozucusuna 910 manat məbləğində cərimə və ziyan tətbiq edilib. 

Respublika ərazisində qanunsuz ov hallarının qarşısını almaq məqsədilə reydlər davam etdirilir. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi