Azərbaycan qaz kəmərlərində itkiləri 2020-ci ilədək azaldacaq

Bakı. 2 iyun. REPORT.AZ/ Qaz paylayıcı sistemlərdə qaz kəmərlərinin modernləşdirilməsi və digər tədbirlər nəticəsində itkilərin 2020-ci ilə qədər endirilməsi, 2050-ci ilə qədər isə azalmanın miqdarının beynəlxalq standartlara uyğunlaşdırılması planlaşdırılır.

"Report" xəbər verir ki, bunu Bakıda keçirilən Xəzər neft-qaz konfransında Azərbaycanın ekologiya və təbii sərvətlər nazirinin müavini Novruz Quliyev bildirib.

Onun sözlərinə görə, neft-qaz hasilatı zamanı atmosferə atılan qazların yığılması, neft-qaz emalında, paylama şəbəkələrində qaz sızmalarının qarşısının alınması ilə bağlı qəbul olunmuş strategiyaya əsasən, 2030-cu ilə qədər atmosferə atılan fugitiv emissiyaların həcminin kəskin azaldılması planlaşdırılır.

"Azərbaycan qlobal iqlim dəyişmələrinə təsirlərin yumşaldılması təşəbbüslərinə töhfəsi olaraq baza ili ilə (1990-ci il) müqayisədə 2030-cu ilə istilik effekti yaradan qaz emissiyalarının 35% azalma səviyyəsində saxlanmasını hədəf kimi götürüb", - deyə nazir müavini qeyd edib.